ଭୁବନେଶ୍ବର: ସାଧାରଣତଃ ଝିଅ ମାନେ ସାପ ନାଁ ଶୁଣିଲେ ଯେତିକି ଡରନ୍ତି, ପାଖରେ ଦେଖିଲେ ତା' ଠାରୁ ଅଧିକ ଭୟ କରନ୍ତି । ସାପ ଦେଖିଲା ମାତ୍ରେ ଛାତିରେ ଛନକା ପସିଯାଏ । ଏଭଳି ସ୍ଥିତିରେ କୌଣସି ଝିଅର ଯେ ସାପ ଧରିବା ନିଶା ହୋଇପାରେ, ତାହା ବିଶ୍ବାସ କରିବା କଷ୍ଟ । କିନ୍ତୁ ସବୁ ଭୟକୁ ପଛରେ ପକାଇ ସିଲକା ସଲୋନୀ ହୋଇପାରିଛନ୍ତି ଓଡ଼ିଶାର ପ୍ରଥମ ମହିଳା ସାପ ଧରାଳି । ଆଉ ଏହାକୁ ନିଶା ଭାବେ ଆଦିର ନେଇ ଅନ୍ୟ ପାଇଁ ସାଜିଛନ୍ତି ଉଦାହରଣ ।
ଦିନ ନାହିଁ କି ରାତି ନାହିଁ ଫୋନକଲଟିଏ ଆସିଲେ ବିନା ଦ୍ଵନ୍ଦରେ ସାପ ଧରିବା ପାଇଁ ବାହାରି ଆସନ୍ତି ସିଲକା । 17 ବର୍ଷ ବୟସରୁ ସିଲକା ବାପା ଏବଂ ଭାଇଙ୍କୁ ଦେଖି ସାପ ଧରିବାକୁ ଆଗ୍ରହ ପ୍ରକାଶ କରିଥିଲେ । ଇତିମଧ୍ୟରେ ସେ ଚିତି, ବୋଡ଼ା, ରଣା, ନାଗ ସାପ ଭଳି 400ରୁ ଅଧିକ ବିଷଧର ସାପ ସେ ଧରି ସାରିଲେଣି ।
ସିଲକା ଏବେ ବିଜେବି ମହାବିଦ୍ୟାଳୟରେ ସାମ୍ବାଦିକତା ବିଭାଗରେ ପାଠ ପଢ଼ୁଥିବାବେଳେ ଆଗକୁ ସେ ଜଣେ ଉଚ୍ଚ କୋଟିର ସାମ୍ବାଦିକ ହେବାର ଲକ୍ଷ୍ୟ ରଖିଛନ୍ତି । ବିଭିନ୍ନ ପ୍ରକାରର ବିଷଧର ସାପ ଧରିଥିଲେ ମଧ୍ୟ ଆଜି ପର୍ଯ୍ୟନ୍ତ ସେ ଅହିରାଜ ସାପ ଧରିନାହାନ୍ତି । ତେବେ ସୁଯୋଗ ମିଳିଲେ ତାହା କରି ଦେଖାଇ ପାରିବେ ବୋଲି ସେ କହିଛନ୍ତି । ସେ କୁହନ୍ତି, ଯେତେବେଳେ ସେ ପ୍ରଥମେ ସାପ ଧରିଲେ ସେତେବେଳେ ଡର ତ ଲାଗିଥିଲା । ତେବେ ପ୍ରତିଟି ନୂଆ ଜିନିଷ ଆରମ୍ଭ କରିବା ପୂର୍ବରୁ ସେନେଇ ମନରେ ବିଭିନ୍ନ ପ୍ରକାର କଥା ଆସେ ଓ ଭୟ ଲାଗେ କିନ୍ତୁ ସେହି ବିଷୟରେ ଅଧିକ ଜ୍ଞାନ ଓ ଦକ୍ଷତା ବଢ଼ିଲା ପରେ ମନରୁ ଭୟ ଆପେ ଆପେ ଲିଭି ଯାଏ । ଏହି କାମରେ ତାଙ୍କ ଘର ଲୋକ ସିଲକାକୁ ସହଯୋଗ କରିଛନ୍ତି । ଯାହାଫଳରେ ସେ ଓଡ଼ିଶାର ପ୍ରଥମ ମହିଳା ସାପ ଧରାଳି ଭାବେ ପରିଚୟ ପାଇଛନ୍ତି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
