ଭୁବନେଶ୍ବର: ସୀମା ଟପୁଛି ପଶୁଙ୍କ ପ୍ରତି ଅତ୍ୟାଚାର, ମଣିଷ ଭୁଲିଯାଉଛି ମାନବିକତା । ଅନ୍ଧାର ରାତିରେ ବୁଲା କୁକୁରକୁ ଜୀଅନ୍ତା ଜାଳିଦେଲେ । ରାଜଧାନୀର ଲକ୍ଷ୍ମୀ ସାଗର ଅଞ୍ଚଳରେ ଏଭଳି ଏକ ଅଭାବନୀୟ ଘଟଣା ଘଟିଛି । ଅଭିଯୋଗ ହେବା ପରେ ପୋଲିସ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି ।
ଲକ୍ଷ୍ମୀସାଗର ଥାନା ଷ୍ଟେସନ ବଜାରରେ ଜଣେ ମହିଳା ବୁଲା କୁକୁରକୁ ନିଆଁ ଲଗାଇ ହତ୍ୟା କରିଥିବା ଅଭିଯୋଗ ହୋଇଛି । କୁକୁର ଉପରେ ପେଟ୍ରୋଲ କିମ୍ବା କିରୋସିନ ପକାଇ ନିଆଁ ଲଗାଇ ଦେଇଥିବା ଲକ୍ଷ୍ମୀସାଗର ଥାନାରେ ଅଭିଯୋଗ ହୋଇଛି । ଷ୍ଟେସନ ବଜାରରେ ବାସ କରୁଥିବା ଅର୍ଚ୍ଚନା ମିଶ୍ର ନାମକ ମହିଳା ଏଭଳି ଅମାନବୀୟ କାଣ୍ଡ ଘଟାଇଥିବା ନେଇ ଥାନାରେ କିଛି ଲୋକ ଅଭିଯୋଗ କରିଛନ୍ତି । ଏନେଇ ପୋଲିସ ପଶୁ କ୍ରୁରତା ନିବାରଣ ଅଧିନିୟମ (Animal cruelty act)ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।
କୁକୁରକୁ ଜୀଅନ୍ତା ଜାଳିଥିବା ଅଭିଯୁକ୍ତକୁ ଧରିବା ପାଇଁ ଯୋଜନା ଚଳାଇଛି ପୋଲିସ । ସେହି ଅଞ୍ଚଳରେ ମହିଳା ଜଣକ ଜଣେ ଏକୁଟିଆ ରୁହନ୍ତି । ସ୍ବାମୀଙ୍କ ଦେହାନ୍ତ ପରେ ସେ ମାନସିକ ଅବସାଦରେ ଥିଲେ । ତେବେ ସେ ଏପରି କାଣ୍ଡ ଘଟାଇପାରିଥାଆନ୍ତି ପୋଲିସ ସୂତ୍ରରୁ ସୂଚନା ମିଳିଛି । କେବଳ ଏହି ଘଟଣା ନୂଆଁ ନୁହେଁ ଗତ କିଛି ଦିନ ତଳେ ଖଣ୍ଡଗିରି ଥାନା ଅଞ୍ଚଳର ଡୁମୁଡୁମାରେ ଜଣେ ବ୍ୟକ୍ତି ଦୁଇଟି କୁକୁରକୁ ଗୁଳି କରିଥିଲେ । ପରେ ଗୋଟିଏ କୁକୁରର ମୃତ୍ୟୁ ହୋଇଥିବା ବେଳେ ଆଉ ଗୋଟିଏ କୁକୁର ହସ୍ପିଟାଲରେ ଚିକିତ୍ସିତ ହେଉଥିଲା । ପୁର୍ବରୁ ଚନ୍ଦ୍ରଶେଖରପୁରଥାନା ଅଞ୍ଚଳରେ କୁକୁର ଛୁଆ ଉପରେ ଗାଡି ଚଢ଼ାଇ ହତ୍ୟା ମାମଲାରେ ମଧ୍ୟ ଜଣେ ଯୁବକ ଗିରଫ ହୋଇଥିବା ନଜିର ରହିଛି ।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
