ଭୁବନେଶ୍ବର: ରାଜଧାନୀରେ ଖେଳିଲା ଚାଞ୍ଚଲ୍ୟ । ବରମୁଣ୍ଡାର ଏକ ନାଳରୁ ମିଳିଛି ଏକ କଟା ଗୋଡ। ପଚିସଢି ଯାଇଥିବା ଅବସ୍ଥାରେ ବରମୁଣ୍ଡା ବ୍ରିଜ କଡ ନାଳରୁ ମିଳିଛି କ୍ଷତାକ୍ତ ଗୋଡଟି। ଶରୀରରୁ ଅଲଗା ହୋଇଥିବା କଟା ଗୋଡଟି ବାମପାର୍ଶ୍ବ ଗୋଡ ବୋଲି ଜଣାପଡିଛି।
ଗୋଡର ଆକାର ଓ ନଖରୁ ଏହା ପୁରୁଷ ଲୋକର ବୋଲି ପୋଲିସ ସନ୍ଦେହ କରିଛି। ତେବେ ଗୋଡଟି କାହାର ଓ ଶରୀରର ଅନ୍ୟ ଅଙ୍ଗ କେଉଁଠି ତାକୁ ନେଇ ବଢି଼ଛି ପୋଲିସ ସନ୍ଦେହ। ଦୁଇ ତିନି ଦିନ ତଳେ ଲୋକଟିର ଗୋଡ କଟା ଯାଇଥିବା ଜଣାପଡିଛି। ତେବେ ବ୍ୟକ୍ତିକୁ ହତ୍ୟା କରାଯାଇ ଏଣେ ତେଣେ ଫିଙ୍ଗାଯାଇଛି ନା ହତ୍ୟା ପରେ କୌଣସି ସ୍ଥାନରେ ପୋତାଯାଇଛି, ଯାହାର ଅଙ୍ଗକୁ କୁକୁର ବା ବିଲୁଆ ଆଣି ଥାଇପାରନ୍ତି ବୋଲି ସନ୍ଦେହ ଉପୁଜିଛି ।
ଏନେଇ ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଘଟଣା ନେଇ ସମସ୍ତ ଥାନାକୁ ମିସିଙ୍ଗ ରିପୋର୍ଟର ତଥ୍ୟ ମାଗିଛି ପୋଲିସ। କଟା ଗୋଡଟି ଏପରି ଅବସ୍ଥାରେ ପଡିବା ଘଟଣା ହତ୍ୟା ଦିଗକୁ ମୋଡ ନେଇଛି। ତେବେ ଗୋଡ ମିଳିଥିବା ସ୍ଥାନରେ ଆବର୍ଜନା ଜମା ହେଉଥିବାରୁ ଏହା ଅନ୍ୟ ସ୍ଥାନରୁ ଆସିଥିବା ସନ୍ଦେହ କରୁଛି ପୋଲିସ । ଏନେଇ ଖଣ୍ଡଗିରି ଥାନା ପକ୍ଷରୁ ସ୍ଥାନୀୟ ଅଞ୍ଚଳରେ ସନ୍ଧାନୀ କୁକୁର ସାହାଯ୍ୟରେ ସର୍ଚ୍ଚ ଅପରେସନ ଜାରି ହୋଇଛି । ତେବେ ମିଳିଥିବା କଟା ଗୋଡରୁ ପୋଲିସ ବ୍ୟକ୍ତିର ପରିଚୟ ଖୁଲାସା କରିପାରିବ କି ନାହିଁ ତାହା କମିସନରେଟ ପୋଲିସ ଉପରେ ନିର୍ଭର କରୁଛି।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
