ଭୁବନେଶ୍ବର: ନୂଆ ମୋଟର ଯାନ ଆଇନ ପଡିଲା ମହଙ୍ଗା । ଧରାପଡିଲେ ଅଟୋ ଚାଳକ । ଫସିଲେ ଅଟୋ ମାଲିକ । ଭୁବନେଶ୍ବରରେ ଏମଭିଆଇ ଚେକିଂ ବେଳେ ଧରାପଡି 47500 ଟଙ୍କାର ଫାଇନ କରିଛି ଆରଟିଓ ଭୁବନେଶ୍ବର।
ତେବେ ଆଚାର୍ଯ୍ୟ ବିହାର ଛକରେ ଚେକିଂ ବେଳେ ଜଣେ ଅଟୋ ଡ୍ରାଇଭର ମଦ୍ୟପ ଅବସ୍ଥାରେ ଗାଡି ଚଲାଉଥିଲେ । ଏହି ସମୟରେ ସାଧାରଣ ଚେକିଂରେ ସେ ଧରାପଡିଥିଲେ । ଏହାପରେ ସେ ଅଟୋର ସମସ୍ତ ଚେକିଂ ହୋଇଥିଲା । ଆଉ ଏହି ସମୟରେ ଅଟୋ ଉପରେ 47500ଟଙ୍କାର ଫାଇନ ଲଗାଇଥିଲେ ଆରଟିଓ। ତେବେ କେଉଁ କାରଣରୁ ଅଟୋ ମାଲିକଙ୍କୁ ଏତେ ଟଙ୍କାର ଜୋରିମାନା ଦେବାକୁ ପଡିବ ପଢନ୍ତୁ....
- ଅଟୋର ରେଜିଷ୍ଟ୍ରେସନ ନଥିବା କାରଣରୁ 5 ହଜାର
- ଡ୍ରାଇଭିଂ ଲାଇସେନ୍ସ ନଥିବା ଯୋଗୁଁ 5 ହଜାର
- ବିନା ମାଲିକାନାରେ ଅଟୋ ଚାଳନା 5 ହଜାର
- ମଦ୍ୟପାନ ଅବସ୍ଥାରେ ଅଟୋ ଚଲାଇବା କାରଣରୁ 10 ହଜାର
- ପଲ୍ୟୁସନ୍ କ୍ଲିୟରାନ୍ସ ନଥିବା ପାଇଁ 10 ହଜାର
- ସହର ଭିତରେ ବିନା ଅନୁମତିରେ ଅଟୋ ଚାଳନା କରିବା ନେଇ 10 ହଜାର
- ଇନ୍ସୁରାନ୍ସ ନଥିବା କାରଣରୁ 2 ହଜାର
ଏହାସହ କୌଣସି କାଗଜପତ୍ର ପ୍ରମାଣ ନ ଦେବାରୁ ମୋଟ 47500 ଟଙ୍କା ଫାଇନ ହୋଇଛି । ଏସବୁର ପ୍ରମାଣ ଦେଖାଇଲେ ହୁଏତ ପରବର୍ତ୍ତୀ ପର୍ଯ୍ୟାୟରେ ଏହି ଫାଇନ ପରିମାଣ କମିପାରେ ।
ତେବେ ଅଟୋ ଡ୍ରାଇଭର ହରିବନ୍ଧୁ କହଁରକୁ ଫାଇନ ଚାଲାଣ ଦିଆଯାଇଛି । ପରବର୍ତ୍ତୀ ପର୍ଯ୍ୟାୟରେ ଫାଇନ ନଦେଲେ ଅଟୋର ମାଲିକ ନୟାଗଡର କଣ୍ଡୁରି ଖଟୁଆଙ୍କ ବିରୋଧରେ କୋର୍ଟରେ ମାମଲା ଦାଏର କରାଯିବ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
