ଭୁବନେଶ୍ବର: ଆସନ୍ତା 12ରୁ ଚାଲିବ 3ଟି ଶ୍ରମିକ ସ୍ପେଶାଲ ଟ୍ରେନ । ପୁରୀ-ଅହମ୍ମଦାବାଦ, ପୁରୀ-ଗାନ୍ଧୀଧାମ ଓ ପୁରୀ-ଓଖା ରୁଟରେ ଚାଲିବ ଟ୍ରେନ । ଏନେଇ ଟ୍ବିଟ୍ କରି ସୂଚନା ଦେଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ପ୍ରବାସୀ ଓଡିଆ ମାନେ ସେମାନଙ୍କ କର୍ମକ୍ଷେତ୍ରକୁ ଫେରିବାକୁ ଚାହୁଁଥିବାବେଳେ ଏହା ସେମାନଙ୍କ ପାଇଁ ସୁବିଧା ହେବ ବୋଲି ସେ ଜଣାଇଛନ୍ତି । ସେହିପରି ରେଳମନ୍ତ୍ରୀ ତାଙ୍କ ଅନୁରୋଧ ରକ୍ଷା କରି ଏପରି କରିଥିବାରୁ ପ୍ରଧାନମନ୍ତ୍ରୀ ଓ ରେଳମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ଧର୍ମେନ୍ଦ୍ର ପ୍ରଧାନ ।
ସୂଚନାଥାଉକି, ଗତକାଲି ଓଡିଶାରୁ ଗୁଜୁରାଟ, ମହାରାଷ୍ଟ୍ର ଓ କର୍ଣ୍ଣାଟକ ପରି ରାଜ୍ୟକୁ ସ୍ପେଶାଲ ଟ୍ରେନ ଚଲାଇବାକୁ ରେଳମନ୍ତ୍ରୀଙ୍କ ଚିଠି ଲେଖିଥିଲେ ଧର୍ମେନ୍ଦ୍ର । ଏଥିରେ ସେ ଲୋକମାନେ ନିଜ ଜୀବିକା କ୍ଷେତ୍ରକୁ ଫେରିବାକୁ ଚାହୁଁଛନ୍ତି । ମୌସୁମୀ କାରଣରୁ ବସରେ ଯିବା ସୁରକ୍ଷିତ ନୁହେଁ ଦର୍ଶାଇ ଶ୍ରମିକ ସ୍ପେଶାଲ ଟ୍ରେନ ଚଳାଇବାକୁ ଚିଠିରେ ସେ ଉଲ୍ଲେଖ କରିଥିଲେ ।
ତେବେ ଏହି ତିନି ଟ୍ରେନ ମଧ୍ୟରେ ପୁରୀ-ଅହମ୍ମଦାବାଦ ସପ୍ତାହକୁ 4 ଥର, ପୁରୀ ଗାନ୍ଧୀଧାମ ଓ ପୁରୀ-ଓଖା ଏକ୍ସପ୍ରେସ ସପ୍ତାହକୁ ଥରେ ଯିବ ବୋଲି ଜଣାପଡିଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
