ଭୁବନେଶ୍ବର: ରାଜଧାନୀ ପାଲଟିଛି ଲୁଟେରାଙ୍କ ହବ୍ । ଦିନ ଦ୍ବିପ୍ରହରରେ ଚାଲିଛି ଲୁଟପାଟ । ସେ ବି ଫିଲ୍ମ ଷ୍ଟାଇଲରେ । ମଞ୍ଚେଶ୍ବର ଥାନା ଅଧୀନରେ ମୁଖା ପିନ୍ଧି ଲୁଟେରାଙ୍କ ସିରିଜ ଲୁଟ । ବନ୍ଧୁକ ମୁନରେ ଅଟୋରେ ଯାଉଥିବା ଦମ୍ପତିଙ୍କଠାରୁ 3 ଲୁଟେରା ଲୁଟିନେଲେ 75ଗ୍ରାମ ସୁନା ଅଳଙ୍କାର ।
ଆଜି ଭୋର 5ଟାରେ ଅଟୋରେ ଯାଉଥିବା ଦମ୍ପତିଙ୍କଠାରୁ ହୋଇଛି ଲୁଟ । ଦମ୍ପତି ନିଜ ପିତାଙ୍କ ଶ୍ରାଦ୍ଧ ପକାଇବାକୁ ଷ୍ଟେସନ ଅଭିମୁଖେ ଯାଉଥିବାବେଳେ ତିନି ଜଣ ମୁଖା ପିନ୍ଧା ଦୁର୍ବୃତ୍ତ ଆସି ଅଟୋକୁ ଅଟକାଇ ଦମ୍ପତିଙ୍କ ଛୋଟ ଝିଅ ବେକରେ ବନ୍ଧୁକ ଲଗାଇବାରୁ ଦମ୍ପତି ନିଜର ସମସ୍ତ ସୁନା ଗହଣା ଦେଇ ଦେଇଥିଲେ ।
ତେବେ ଦିନ ହେଉ କି ରାତି ରାଜଧାନୀରେ ଲୁଟେରାଙ୍କ ଉତ୍ପାତ ଦିନକୁ ଦିନ ଅତ୍ୟଧିକ ହେବାକୁ ଘରୁ ବାହାରିବା ବି କଷ୍ଟକର ହୋଇପଡିଛି । ତେବେ ଲୁଟେରା ଖୁଲମଖୁଲା ଲୁଟ କରିଥିବାବେଳେ ପୋଲିସ କିଛି ସ୍ଥାନରେ ପାଟ୍ରୋଲିଂ କରୁନଥିବାରୁ ଏଭଳି ଅଭାବନୀୟ ଘଟଣା ଘଟୁଛି ବୋଲି କହିଛନ୍ତି ଦମ୍ପତି ।
ଅନ୍ୟପକ୍ଷରେ ଘଟଣାକୁ ନେଇ ଡିସିପି ଅନୁପ ସାହୁ କହିଛନ୍ତି ଯେ ଘଟଣାର ତଦନ୍ତ ଚାଲିଛି, ଖୁବଶିଘ୍ର ସେମାନେ ଧରାପଡିବେ । ତେବେ କିଛିଦିନ ତଳେ କମିଶନରେଟ ପୋଲିସ ସ୍ପେଶାଲ ଡ୍ରାଇଭ ଆରମ୍ଭ ହୋଇଥିବାବେଳେ ବିଭିନ୍ନ ସ୍ଥାନରେ ଦିନ ରାତି ପାଟ୍ରୋଲିଂ ବ୍ୟବସ୍ଥାକୁ କଡାକଡି କରାଯାଇଥିଲା । କିନ୍ତୁ ଆଜି ଭୋରର ସିରିଜ ଲୁଟ ଘଟଣା କମିଶନରେଟ ପୋଲିସର ପାଟ୍ରୋଲିଂର ଅବ୍ୟବସ୍ଥା ପଦାରେ ପଡିଛି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
