ଭଦ୍ରକ: ପ୍ରଧାନମନ୍ତ୍ରୀ ଆବାସ ଯୋଜନାରେ ଜାଲିଆତି। ଜଣଙ୍କ ନାମରେ ଘର, ଆଉ ଜଣଙ୍କ ବ୍ୟାଙ୍କ ଖାତାରେ ପଇସା। ଭଦ୍ରକ ଜିଲ୍ଲାର ଭଣ୍ଡାରିପୋଖରୀ ବ୍ଲକର ନପଙ୍ଗ ପଞ୍ଚାୟତରେ ହୋଇଛି ଏପରି ଦୁର୍ନୀତି।
ଚଳିତ 2019-2020 ଆର୍ଥିକ ବର୍ଷରେ ଏହି ପଞ୍ଚାୟତର 88 ଜଣ ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାରେ ସାମିଲ କରିବା ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ଅଦ୍ୟାବଧି 56 ଜଣଙ୍କୁ ଏଥିରେ ସାମିଲ କରାଯାଇଛି। ତେବେ ପଞ୍ଚାୟତରେ ଅଜୟ ନାୟକ, ପିତା କେଶବ ନାୟକ ନାମକ ଜଣେ ହିତାଧିକାରୀଙ୍କ ନାମ ପ୍ରଧାନମନ୍ତ୍ରୀ ଆବାସ ଯୋଜନାରେ ସାମିଲ ଥିଲା । ହେଲେ ତାଙ୍କ ଘର ନମ୍ବର ପକାଇ ଅନ୍ୟଜଣେ ଅଜୟଙ୍କ, ପିତାଙ୍କ ଫଟୋ ଉଠାଇନେବା ସହ ତାଙ୍କ ବ୍ୟାଙ୍କ ଖାତାକୁ ପଇସା ପଠାଯାଇଥିବା ଅଭିଯୋଗ ହୋଇଛି।
କେବଳ ଏତିକିରେ ସରିନି ନପଙ୍ଗ ପଞ୍ଚାୟତରେ ଆବାସ ଯୋଜନାରେ ଦୁର୍ନୀତି । ଏଠାରେ ସରପଞ୍ଚ ଘର କରାଇଦେବାକୁ 5 ହଜାର ଟଙ୍କା ନେଇଥିବା ମଧ୍ୟ ଅଭିଯୋଗ ହେଉଛି। ଏହାଛଡା ଗୋଟିଏ ପରିବାରର ସ୍ବାମୀ, ସ୍ତ୍ରୀ, ପୁଅ, ବୋହୂଙ୍କ ନାମରେ ମଧ୍ୟ ଆବାସ ଆବଣ୍ଟିତ ହେଉଥିବା କୁହାଯାଉଛି।
ଏଭଳି ସଙ୍ଗୀନ ଅଭିଯୋଗ ନପଙ୍ଗ ପଞ୍ଚାୟତରେ ଉଠୁଥିବାବେଳେ, ଭଣ୍ଡାରିପୋଖରୀ ବିଡିଓ ଏନେଇ ମୁହଁ ଖୋଲିବାକୁ ନାରାଜ। ସେପଟେ ନିଜ ନାମରେ ଆସିଥିବା ଘରର ପଇସା ଅନ୍ୟ ଜଣଙ୍କ ଖାତାକୁ ଚାଲି ଯାଇଥିବାରୁ ଧର୍ମକୁ ହାତ ଟେକି ଦେଇଛନ୍ତି ହିତାଧିକାରୀ ଅଜୟ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
