ଭଦ୍ରକ: ପୁଣି ବ୍ରାଉନସୁଗାର ଜବତ କଲା ପୋଲିସ । ଏଥିରେ ଦୁଇ ଯୁବକଙ୍କ ସମ୍ପୃକ୍ତି ଥିବା ନେଇ ପୋଲିସ ଗିରଫ କରିଛି । ସୂଚନାନୁଯାୟୀ ଭଦ୍ରକ ଜିଲ୍ଲା ଆଗରପଡା ଅଞ୍ଚଳର ଦୁଇଜଣ ଯୁବକ ଜଳେଶ୍ବରରୁ ବ୍ରାଉନ ସୁଗାର ଆଣି ନିଜ ଗାଁ ଅଞ୍ଚଳରେ ବେପାର ପାଇଁ ଯାଉଥିବାବେଳେ ପୋଲିସ କାବୁ କରିଥିଲା ।
10 ଲକ୍ଷ ଟଙ୍କାରୁ ଉର୍ଦ୍ଧ୍ୱ ମୂଲ୍ୟର ବ୍ରାଉନ ସୁଗାର ଜବତ: 2ଗିରଫ
ଭଦ୍ରକ ଟାଉନ ପୋଲିସ ଖବର ପାଇ 16 ନମ୍ବର ଜାତୀୟ ରାଜପଥର ମୋଟେଲଛକ ନିକଟରେ ବାଇକ ଅଟକାଇ ଚେକିଂ ଜାରି ରଖିଥିଲା । ଆଉ ଚେକିଂ ସମୟରେ ଉଭୟଙ୍କ ନିକଟରୁ 112 ଗ୍ରାମର ବ୍ରାଉନ ସୁଗାର ଜବତ କରିଛି । ପଚରାଉଚରା ବେଳେ ସେମାନେ ଜଳେଶ୍ବରରୁ ବ୍ରାଉନ ସୁଗାର ଆଣୁଥିବା ନେଇ ପୋଲିସକୁ ସୂଚନା ଦେଇଛନ୍ତି ।
ତେବେ ସେମାନଙ୍କ ନିକଟରୁ 2 ମୋବାଇଲ ସହ ବାଇକ ମଧ୍ୟ ଜବତ ହୋଇଛି । ଜବତ ବ୍ରାଉନ ସୁଗାରର ମୂଲ୍ୟ 10 ଲକ୍ଷ ଟଙ୍କାରୁ ଊର୍ଦ୍ଧ୍ୱ ହେବ ବୋଲି ଭଦ୍ରକ ଏସଡ଼ିପିଓ ସାର୍ଥକ ରାୟ ସୂଚନା ଦେଇଛନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
