ବ୍ରହ୍ମପୁର: ଦୁଇ ହାତରେ 12 ଆଙ୍ଗୁଠି ଏବଂ ଦୁଇ ପାଦରେ 19 ଆଙ୍ଗୁଠି ପାଇଁ ଗିନିଜ ବୁକ୍ ଅଫ୍ ଓ୍ବାର୍ଲ୍ଡ ରେକର୍ଡ କଲେ ମହିଳା । ଗଞ୍ଜାମ ଜିଲ୍ଲା ବୁଗୁଡା ବ୍ଲକ କଳମ୍ବ ପଞ୍ଚାୟତ କାଦପଡା ଗ୍ରାମର 75 ବର୍ଷୀୟା କୁମାରୀ ନାୟକ ହାତରେ 12ଟି ଅଙ୍ଗୁଳି ଓ ପାଦରେ 19ଟି ପାଇଁ ଗିନିଜ ରେକର୍ଡ ପ୍ରତିଷ୍ଠା କରିଛନ୍ତି ।
ପୂର୍ବରୁ 2014ରେ ଦୁଇ ହାତରେ 14 ଏବଂ ଦୁଇ ପାଦରେ 12 ଆଙ୍ଗୁଠି ପାଇଁ ଦେବେନ୍ଦ୍ର ସୂତାର ଗିରିଜ ରେକର୍ଡ କରିଥିଲେ । ତେବେ ଅଧିକ ସଂଖ୍ୟାରେ ଆଙ୍ଗୁଠି (31) ପାଇଁ ଦେବେନ୍ଦ୍ରଙ୍କ ରେକର୍ଡ ଭାଙ୍ଗିଛନ୍ତି କୁମାରୀ ।
ଏହାସହ ବୃଦ୍ଧା ଜଣଙ୍କ ପିଲାଟି ଦିନରୁ କଥା କହି ପାରନ୍ତିନି । ତେବେ ତାଙ୍କ ଶରୀରରେ ଦେଖାଦେଇଥିବା ଏହି ଲକ୍ଷଣକୁ ଡାକ୍ତରୀ ଭାଷାରେ ପଲିଡାକ୍ଟଲି କୁହାଯାଏ । ଏଥିରେ ସାଧାରଣ ଲୋକଙ୍କ ଠାରୁ ଏମାନଙ୍କ ଆଙ୍ଗୁଳି ସଂଖ୍ୟା ଅଧିକ ରହିଥାଏ ।
ସେପଟେ ବୃଦ୍ଧାଙ୍କ କୌଣସି ପରିବାର ନଥିବାରୁ ସେ ସ୍ଥାନୀୟ ଅଙ୍ଗନୱାଡି କେନ୍ଦ୍ର ଉପରେ ଭରସା କରି ଚଳି ଆସୁଥିଲେ । ହେଲେ ତାଙ୍କ ବିଷୟରେ ଜାଣିବା ପରେ ସ୍ଥାନୀୟ ବିଧାୟକଙ୍କ ପରାମର୍ଶରେ ଅଗଷ୍ଟ 4 ତାରିଖରେ ତାଙ୍କୁ ନିଜ ଗ୍ରାମରୁ ଆଣି ପୋଲସରା ନିକଟସ୍ଥ ହାତିଓଟ ଗ୍ରାମର ଜରାଶ୍ରମରେ ରଖାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
