ବ୍ରହ୍ମପୁର: ଭିଜିଲାନ୍ସ ଚଢାଉରେ ଗୋଟିଏ ମାଉଜର ସହ ଛଅ ରାଉଣ୍ଡ ଗୁଳି ଜବତ । ବୁଧବାର ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକର ଆଙ୍କରଡା ଗ୍ରାମପଞ୍ଚାୟତ ସରପଞ୍ଚ ଉଷାନ୍ତ ସାହୁଙ୍କ ଘରେ ଭିଜିଲାନ୍ସ ଚଢାଉ ବେଳେ ଗୋଟିଏ ମାଉଜର ସହ ଛଅ ରାଉଣ୍ଡ ଅଫୁଟା ଗୁଳି ଜବତ କରିଛି ଭିଜିଲାନ୍ସ ବିଭାଗ ।
ସୂଚନା ଅନୁଯାୟୀ, ବୁଧବାର ଆଙ୍କରଡା ଗ୍ରାମପଞ୍ଚାୟତ ସରପଞ୍ଚ ଉଷାନ୍ତ ସାହୁଙ୍କ ଘରେ ଭିଜିଲାନ୍ସ ଚଢାଉ କରିଥିଲା । ଛାନଭିନ୍ ବେଳେ ତାଙ୍କ ଘରୁ ଗୋଟିଏ ମାଉଜର, ଛଅ ରାଉଣ୍ଡ ଜୀବନ୍ତ ଗୁଳି, ୬୧୫ ଗ୍ରାମ୍ ସୁନା ଅଳଙ୍କାର, ୧୪ ଶହ ଗ୍ରାମର ରୂପା ଅଳଙ୍କାର ସହ ନଗଦ ୪୪ ହଜାର ଟଙ୍କା ଜବତ କରାଯାଇଛି । ଏହାପରେ ଭିଜିଲାନ୍ସ ବିଭାଗ ପୋଲିସ ବିଭାଗକୁ ବନ୍ଧୁକ ଓ ଗୁଳିକୁ ହସ୍ତାନ୍ତର କରିବା ସହ ପୋଲିସ ଅଧିକ ତଦନ୍ତ କରିବା ପାଇଁ ବିଭାଗ ପକ୍ଷରୁ ଚିଠି ଲେଖାଯାଇଛି ।
ସେପଟେ ସରପଞ୍ଚଙ୍କ 6ଟି ସ୍ଥାନରେ ଚଢାଉ କରାଯାଇ ଦଶ ଲକ୍ଷ ଟଙ୍କାର ମୋଟ ୧୧ ଟି ପ୍ଲଟ ସହ ୪ଟି ଘର ଥିବା ଜଣାପଡିଛି । ଏଥିସହ ବିଭିନ୍ନ ବ୍ୟାଙ୍କରେ ପ୍ରାୟ ୨୮ ଲକ୍ଷ ୮୦ ହଜାର ଟଙ୍କା ରହିଥିବା ବେଳେ ସରପଞ୍ଚଙ୍କ ଦୁଇଟି ଦାମୀ କାର, ଗୋଟିଏ ବୁଲେଟ ଓ ଦୁଇଟି ମୋଟର ସାଇକେଲ ରହିଥିବା ଜଣାପଡିଛି । ତେବେ ସରପଞ୍ଚଙ୍କ ସମସ୍ତ ସମ୍ପତ୍ତିର ମୂଲ୍ୟ 1,49,4543 ଟଙ୍କା ବୋଲି ବ୍ରହ୍ମପୁର ଭିଜିଲାନ୍ସ ଏସପି ମାୟାଧର ସ୍ୱାଇଁ କହିଛନ୍ତି । ସେପଟେ ସରପଞ୍ଚଙ୍କ ଘରେ ଆୟବର୍ହିଭୂତ ସମ୍ପତ୍ତି ଠାବ ହେବା ଘଟଣା ସାରା ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।
ବ୍ରହ୍ମପୁରରୁ ସମୀର ଆର୍ଚାର୍ଯ୍ୟ, ଇଟିଭି ଭାରତ
