ବ୍ରହ୍ମପୁର: ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅନ୍ତର୍ଗତ ପଦ୍ମନାଭପୁର ଗ୍ରାମସ୍ଥିତ ସରସ୍ବତୀ ଶିଶୁ ମନ୍ଦିର ଶ୍ରୀଧାମ ଆବାସିକ ବିଦ୍ୟାଳୟ ଛାତରୁ ଡେଇଁ ଛାତ୍ରୀଙ୍କ ଆତ୍ମହତ୍ୟା ଉଦ୍ଯମ । ଶୁକ୍ରବାର ରାତି ପ୍ରାୟ 2 ଟା ସମୟରେ ହଷ୍ଟେଲର ଜଣେ ନବମ ଶ୍ରେଣୀ ଛାତ୍ରୀ ଛାତ ଉପରୁ ଡେଇଁ ଆତ୍ମହତ୍ୟା ଉଦ୍ୟମ କରିଥିବା ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଏପରିକି ଆହତ ଛାତ୍ରୀଙ୍କୁ ସ୍ଥାନୀୟ ଲୋକେ ଉଦ୍ଧାର କରିବା ପରେ ଛାତ୍ରୀ ଜଣଙ୍କ ଗତ ମାସେ ହେଲା ବିଦ୍ୟାଳୟ କର୍ତ୍ତୃପକ୍ଷ ନିଜ ପରିବାର ସହ ଫୋନ ଯୋଗେ କଥାବାର୍ତ୍ତା ହେବା ପାଇଁ ଦେଉନଥିବା ପ୍ରକାଶ କରିଛନ୍ତି ।
ଘର ଲୋକଙ୍କ ସହ ମାସେ ହେବ କଥାବାର୍ତ୍ତା ହେବାକୁ ଦେଉନଥିବାରୁ ଛାତ୍ରୀଜଣଙ୍କ ମାନସିକ ଭାରସାମ୍ୟ ହରାଇ ଏପରି ଛାତରୁ ଡେଇଁ ପଡିଥିଲେ । ଫଳରେ ଛାତ୍ରୀଙ୍କ ଗୋଡରେ ଅଧିକ ଆଘାତ ହୋଇଥିବାରୁ ରାତିରେ ଏଭଳି ଅବସ୍ଥାରେ ଘୋଷାଡି ହୋଇ ଆସି ରାସ୍ତା ପାର୍ଶ୍ବରେ ରହୁଥିବା ଜଣଙ୍କ ଘର କବାଟ ବାଡେଇଥିଲେ । ଏହାପରେ ସମ୍ପୃକ୍ତ ପରିବାରର ସଦସ୍ୟ ଉଠି ଛାତ୍ରୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିଥିବା ଜଣାପଡିଛି ।
ଏହି ଘଟଣା ଜଣା ପଡିବା ପରେ ପଦ୍ମନାଭପୁର ଗ୍ରାମବାସୀ ଉତ୍ତ୍ୟକ୍ତ ହୋଇ ଟାୟାର ଜାଳି ଦିଗପହଣ୍ଡି ଓ ଚିକିଟି ମୁଖ୍ୟରାସ୍ତାକୁ ଅବରୋଧ କରିବା ପରେ ଘଟଣାସ୍ଥଳରେ ସ୍ଥାନୀୟ ତହସିଲଦାର ଅଦୈତ୍ୟ କୁମାର ସ୍ବାଇଁ ଓ ବିଡିଓ ହର ଶବର ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା ପରେ ପରିସ୍ଥିତି ସ୍ବାଭାବିକ ହୋଇଥିଲା । ସେପଟେ ଆହାତ ଛାତ୍ରୀଙ୍କୁ ଚିକିତ୍ସା ପାଇଁ ବ୍ରହ୍ମପୁର ଅଣାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
