ବ୍ରହ୍ମପୁର: ଓଡିଶା ରାଜ୍ୟ ବିଦ୍ୟୁତ ଶ୍ରମିକ କର୍ମଚାରୀ ସଂଙ୍ଘ ପକ୍ଷରୁ ବ୍ରହ୍ମପୁର ସ୍ଥିତ ସାଉଥକୋ କାର୍ଯ୍ୟାଳୟ ସମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି । ସୋମବାର ସଂଙ୍ଘର ରାଜ୍ୟ ସଂପାଦକ ପ୍ରଶାନ୍ତ ମହାପାତ୍ରଙ୍କ ନେତୃତ୍ବରେ ଏହି ବିକ୍ଷୋଭରେ କରାଯାଇଛି ।
ସୂଚନା ଅନୁଯାୟୀ, ରାଜ୍ୟ ସରକାରଙ୍କ ଶକ୍ତି ବିଭାଗର ବରିଷ୍ଠ ଅଧିକାରୀ ଓ ବିଭାଗ ପକ୍ଷରୁ ଅବସରପ୍ରାପ୍ତ କର୍ମଚାରୀଙ୍କୁ ୧୦୦ ପ୍ରତିଶତ ଏବଂ ଚାକିରୀରେ ଥିବା କର୍ମଚାରୀଙ୍କୁ ୪୦ ପ୍ରତିଶତ ୱେବ ଏରିଅର ଦେବାକୁ ପ୍ରତିଶୃତି ଦିଆଯାଇଥିଲା । ଏଥିସହ ସରକାରଙ୍କ ସମସ୍ତ ବିଭାଗ ପିଟିସିଏଲ୍, ଗ୍ରୀଡକୋ ଏବଂ ଓ.ଇ.ଆର୍.ସି ଦୀର୍ଘଦିନ ହେବ ୪୦ ପ୍ରତିଶତ ବକେୟା ପାଇଥିବା ବେଳେ ପ୍ରତିଶୃତି ଖିଲାପ କରି ପେନସନଧାରୀଙ୍କୁ ୨୫ ପ୍ରତିଶତ ଏବଂ ଚାକିରୀରେ ଥିବା କର୍ମଚାରୀ ମାନଙ୍କୁ ୨୦ ପ୍ରତିଶତ ପାଇଛନ୍ତି ।
ଏହି ଘଟଣା ପରେ ବିତରଣ କମ୍ପାନୀ କର୍ମଚାରୀଙ୍କ ପ୍ରତି ସରକାର ବୈମାତୃକ ମନୋଭାବ ଭଳି ନୀତି ଆପଣାଉଥିବା ନେଇ ସମାଲୋଚନା କରାଯାଇଥିଲା । ଏହାକୁ ନେଇ ସାରା ରାଜ୍ୟରେ ବିରୋଧ କରିବା ସହ ଠିକା କର୍ମଚାରୀଙ୍କୁ ନିୟମିତ କରିବା, ମୃତକଙ୍କ ପରିବାରକୁ ସ୍ଥାୟୀ ନିଯୁକ୍ତି ପ୍ରଦାନ କରିବା, ବୈଷୟିକ ଓ କିରାଣୀ ମାନଙ୍କ କ୍ୟାଡର ଦରମା ବୃଦ୍ଧି କରିବା ଭଳି ବିଭିନ୍ନ ଦାବିକୁ ତୁରନ୍ତ କର୍ତ୍ତୁପକ୍ଷ ଦୃଷ୍ଟି ଦେବାକୁ ଏହି ସଭାରେ ଦାବି କରାଯାଇଥିଲା ।
ଏହି ଆନ୍ଦୋଳନରେ ଦକ୍ଷିଣାଞ୍ଚଳ ଯୋନର ଯୁଗ୍ମ ସମ୍ପାଦକ ସୂର୍ଯ୍ୟ ନାରାୟଣ ବିଷୋୟୀ, ଉପସଭାପତି ଦୁର୍ଗା ମାଧ୍ୟବ ଆଚାର୍ଯ୍ୟ, ପ୍ରଫୁଲ ପଟ୍ଟନାୟକ, କ୍ଷୀରୋଦ କୁମାର ସେଠୀଙ୍କ ସମେତ ଏକତା ମଞ୍ଚର ବହୁ କର୍ମକର୍ତ୍ତା ଉପସ୍ଥିତ ରହିଥିଲେ ।
ବହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
