ବ୍ରହ୍ମପୁର: ଜଣେ ମା’ର ବିୟୋଗ ପରେ ଶେଷକୃତ୍ୟ ପାଇଁ ସଙ୍ଗରୋଧ କେନ୍ଦ୍ରରୁ ପ୍ରଶାସନର ସ୍ବତନ୍ତ୍ର ସୁରକ୍ଷା ବ୍ୟବସ୍ଥାରେ ଆମ୍ବୁଲାନ୍ସ ଯୋଗେ ଶ୍ମଶାନରେ ପହଞ୍ଚିଛି ପୁଅ । ଏଭଳି ଏକ ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲ୍ଲାର ସଦର ମହକୁମା ଛତ୍ରପୁର ବ୍ଲକ ଭିକାରୀପଲ୍ଲୀ ପଞ୍ଚାୟତ ଅନ୍ତର୍ଗତ ଗୋଲାପଲ୍ଲୀ ଗ୍ରାମରେ । ସଙ୍ଗରୋଧ କେନ୍ଦ୍ରରେ ରହିଥିବା ଜଣେ ପ୍ରବାସୀ ଓଡିଆ ସୁରତ ଫେରନ୍ତା ତଥା ଅନ୍ତେବାସୀଙ୍କ ମାତୃ ବିୟୋଗ ହେବା ପରେ ବ୍ଲକ ପ୍ରଶାସନର ସହାୟତାରେ ଅନ୍ତେବାସୀ ଜଣକ ସମଦୂରତା ରକ୍ଷା କରି ମା’ଙ୍କ ଶେଷକୃତ୍ୟ ସମ୍ପନ୍ନ କରିଛନ୍ତି ।
ବି. ନୋକା ପାତ୍ର ନାମକ ଏହି ପ୍ରବାସୀ ଓଡିଆ ଦୀର୍ଘ ଦିନ ଧରି ସୁରତର ଏକ ସୂତାକଳରେ କାର୍ଯ୍ୟ କରି ଆସୁଥିଲେ । ସ୍ବତନ୍ତ୍ର ଟ୍ରେନ ଯୋଗ ଗତ 3 ତାରିଖ ଦିନ ଜଗନ୍ନାଥପୁର ଷ୍ଟେସନରେ ସେ ପହଞ୍ଚିଥିଲେ । ଜିଲ୍ଲା ପ୍ରଶାସନ ପକ୍ଷରୁ ତାଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇ ଏକ ବସ ଯୋଗେ ଛତ୍ରପୁର ନିକଟସ୍ଥ ସରକାରୀ ଆଇଟିଆଇସ୍ଥିତ ସଙ୍ଗରୋଧ କେନ୍ଦ୍ରକୁ ପଠାଯାଇଥିବା ବେଳେ ସେଠାରେ ସେ ରହି ଆସୁଛନ୍ତି । ବର୍ତ୍ତମାନ ସମୟରେ ପରିବାରର ଦୁଃଖ ଉପରେ ଦୁଃଖ ସାଧାରଣରେ ଚର୍ଚ୍ଚାର ବିଷୟ ପାଲଟିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
