ବ୍ରହ୍ମପୁର: ଋଷ ରାଷ୍ଟ୍ରପତିଙ୍କ ଠୁ ପ୍ରଶଂସା ସାଉଣ୍ଟିଥିବା ବିଶ୍ବନାଥଙ୍କୁ ବ୍ରହ୍ମପୁରରେ ସମ୍ବର୍ଦ୍ଧିତ କରାଯାଇଛି । ବ୍ରହ୍ମପୁର ବିଧାୟକ ଓ ସାଂସଦ ତାଙ୍କୁ ସମ୍ବର୍ଦ୍ଧିତ କରିଛନ୍ତି । ବ୍ରହ୍ମପୁର ପୁଅ ପି.ବିଶ୍ବନାଥ ଋଷର ସୋଚି ସହରରେ ଆୟୋଜିତ ଡିପ ଟେକ୍ନୋଲୋଜି ଏଜୁକେସନାଲ୍ ପ୍ରୋଗ୍ରାମରେ ଯୋଗ ଦେଇ ଋଷ ରାଷ୍ଟ୍ରପତିଙ୍କ ଠାରୁ ପ୍ରଶଂସା ସାଉଣ୍ଟିଥିଲେ ।
ବ୍ରହ୍ମପୁର ସହରର କେନ୍ଦ୍ରୀୟ ବିଦ୍ୟାଳୟରେ ଅଧ୍ୟୟନରତ ଥିବା ବିଶ୍ବନାଥ କ୍ଲିନ ଏନର୍ଜି ପ୍ରକଳ୍ପ ମାଧ୍ୟମରେ ନିଜର ପ୍ରକଳ୍ପ ପ୍ରଦର୍ଶନ କରିଥିଲେ । ଏପରିକି ଉକ୍ତ କାର୍ଯ୍ୟକ୍ରମରେ ନ୍ୟୁକ୍ଲିୟର ବ୍ୟାଟେରି ମାଧ୍ୟମରେ ପୃଥିବୀର ଯେ କୌଣସି ସ୍ଥାନରୁ କିଭଳି ବିଦ୍ୟୁତ ଶକ୍ତି ଉତ୍ପାଦନ କରାଯାଇପାରିବ ଏବଂ ତାହାକୁ କୃଷି କ୍ଷେତ୍ରରେ ବ୍ୟବହାର କରାଯାଇପାରିବ । ଏହାସହ ସମୁଦ୍ର ଜଳକୁ ମଧୁର ଜଳରେ ରୂପାନ୍ତରିତ କରାଯାଇପାରିବ ସେନେଇ ଏକ ପ୍ରକଳ୍ପ ଉପସ୍ଥାପନ କରିଥିଲେ ସେ । ସେହି ପ୍ରକଳ୍ପକୁ ବିଧାୟକ ଓ ସାସଂଦଙ୍କ ସମ୍ମୁଖରେ ମଧ୍ୟ ଉପସ୍ଥାପନ କରିଥିଲେ ।
ସମ୍ବର୍ଦ୍ଧିତ କାର୍ଯ୍ୟକ୍ରମରେ ବ୍ରହ୍ମପୁର ସାଂସଦ ଚନ୍ଦ୍ର ଶେଖର ସାହୁ, ବିଧାୟକ ବିକ୍ରମ କୁମାର ପଣ୍ଡାଙ୍କ ସମେତ ବହୁ ପ୍ରମୁଖ ବ୍ୟକ୍ତି ଉପସ୍ଥିତ ଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
