ବ୍ରହ୍ମପୁର: ଧିରେ ଧିରେ ଟାଟା ପାୱାର ପ୍ରତି ସାରା ରାଜ୍ୟରେ ବଢିବାରେ ଲାଗିଛି ଅସନ୍ତୋଷ । ପ୍ରଥମେ ରାଜ୍ୟ ଉପଭୋକ୍ତା ସଙ୍ଘ ପରେ ରାଜ୍ୟ ଠିକା କର୍ମଚାରୀ ସଂଘ ଏବେ ରାଜ୍ୟ ଟ୍ରାନ୍ସଫର୍ମର ଉତ୍ପାଦନ ସଂଘ ଟାଟା ପାଓ୍ବାର ବିରୋଧରେ ବିଷୋଦଗାର କରିବା ଆରମ୍ଭ କଲେଣି । କାରଣ ଟାଟା ପାଓ୍ବାର ଏବେ ରାଜ୍ୟ ବିଦ୍ୟୁତ ଯୋଗାଣ, ରକ୍ଷଣାବେକ୍ଷଣ ଓ ଭିତ୍ତିଭୂମି କ୍ଷେତ୍ରରେ ବେଆଇନ କାର୍ଯ୍ୟକଳାପ ସହ ପାତର ଅନ୍ତର କରୁଥିବା ଅଭିଯୋଗ ବଢିବାର ଲାଗିଛି ।
ରାଜ୍ୟର ଟ୍ରାନ୍ସଫର୍ମର ଉତ୍ପାଦନ ସଂଘ ଦୀର୍ଘ ୩୦ ବର୍ଷ ହେବ ବିଦ୍ୟୁତ ବିଭାଗକୁ ୫୦ରୁ ଊର୍ଦ୍ଧ୍ୱ ୟୁନିଟ୍ ସାଉଥକୋ ଠାରୁ ଆରମ୍ଭ କରି ରାଜ୍ୟର ସମସ୍ତ ବିଦ୍ୟୁତ ବିତରଣକାରୀ ସଂସ୍ଥାକୁ ବିଦ୍ୟୁତ ସରଞ୍ଜାମ ଯୋଗାଇ ଆସୁଥିଲେ । କିନ୍ତୁ ଏବେ ଟାଟା ପାଓ୍ବାର ଓ.ଟି.ଏମ୍.ଏର ସରଞ୍ଜାମକୁ ନିମ୍ନମାନର କହି ରାଜ୍ୟ ବାହାର ସଂସ୍ଥାଠାରୁ ସରଞ୍ଜାମ କ୍ରୟ କରୁଛି । ଫଳରେ ଓ.ଟି.ଏମ୍.ଏର ବ୍ୟବସାୟ କ୍ଷତି ହେବା ସହ ଓଡିଆ ଯୁବକ ଯୁବତୀଙ୍କ ନିଯୁକ୍ତି ପ୍ରଭାବିତ ହୋଇଛି । ଏହାକୁ ବିରୋଧ କରି ଓ.ଟି.ଏମ୍.ଏର କର୍ମକର୍ତ୍ତା ଏକ ସାମ୍ବାଦିକ ସମ୍ମିଳନୀରେ ଏଥି ପ୍ରତି ତୁରନ୍ତ ହସ୍ତକ୍ଷେପ କରିବାକୁ ରାଜ୍ୟ ସରକାରଙ୍କ ନିକଟରେ ଦାବି କରିଛନ୍ତି ।
ଏପରିକି ସଂଘର କର୍ମକର୍ତ୍ତା ମାନେ ସାଉଥକୋର ସିଇଓଙ୍କୁ ସାକ୍ଷାତ କରିବା ସହିତ ଏନେଇ ଏକ ଦାବି ପତ୍ର ପ୍ରଦାନ କରିଛନ୍ତି । ଏ ଏଥିପ୍ରତି ସରକାର ଗୁରୁତ୍ୱ ନଦେଲେ ଆଗାମୀ ଦିନରେ ବ୍ୟାପକ ଆନ୍ଦୋଳନ କରାଯିବାକୁ ଚେତାବନୀ ଦେଇଛି ରାଜ୍ୟ ଟ୍ରାନ୍ସଫର୍ମର ଉତ୍ପାଦନ ସଂଘ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
