ବ୍ରହ୍ମପୁର: ସାମୁଦ୍ରିକ ଶୈବାଳରୁ କିପରି ମିଳିପାରିବ କର୍କଟ ଓ ମଧୁମେହ ରୋଗର ନିବାରଣ ଶକ୍ତି ? ଉଭୟ ଓଡ଼ିଶା ଓ ଆନ୍ଧ୍ର ଉପକୂଳ ସାମୁଦ୍ରିକ ଶୈବାଳ(ଶିଉଳି)ରେ ଔଷଧୀୟ ଗୁଣବତା ରହିଛି କି ? ତାହାକୁ ନେଇ ଦୀର୍ଘ ସାତ ବର୍ଷ ଧରି ପରୀକ୍ଷାଗାରରେ ଅନେକ ଗବେଷଣା କରି ଆସିଥିବା ଓଡ଼ିଆ ଯୁବ ବୈଜ୍ଞାନିକଙ୍କୁ ଅଧିକ ଗବେଷଣା କରିବା ପାଇଁ ସାଉଥ କୋରିଆ ଯିବାକୁ ମିଳିଛି ସୁଯୋଗ । ବ୍ରହ୍ମପୁର ବିଶ୍ୱବିଦ୍ୟାଳୟର ଉଦ୍ଭିଦ ବିଜ୍ଞାନ ବିଭାଗରେ ଗବେଷଣା କରି ଆସୁଥିବା ବିଶ୍ୱଜିତ ପ୍ରଧାନଙ୍କୁ ମିଳିଛି ଏପରି ସୁଯୋଗ ।
କୋଭିଡ ସମୟରେ ଦିନ ରାତି ଏକ କରି ନିଜର ଏହି ଗବେଷଣାକୁ ଆଗେଇ ନେଇଥିଲେ ସେ । ପରେ ଏ ସଫଳତା ତାଙ୍କୁ ମିଳିଥିଲା । ଆନ୍ତର୍ଜାତୀୟ ସ୍ତରର ଜର୍ଣ୍ଣାଲରେ ପ୍ରାୟ ୨୫ ଗୋଟି ରିସର୍ଚ୍ଚ ପେପର ପ୍ରକାଶ ପାଇବା ପରେ ଏଭଳି ସଫଳତା ପାଇବା ସହ ଦକ୍ଷିଣ କୋରିଆସ୍ଥିତ ସଂଗମାୟୁଙ୍ଗ ବିଶ୍ୱବିଦ୍ୟାଳୟରେ ଗବେଷଣା କରିବାର ସୁଯୋଗ ମିଳିଛି । ସେଠାରେ ସେ ସାମୁଦ୍ରିକ ଶୈବାଳର ଔଷଧୀୟ ଉପକାରିତା ବିଷୟରେ ଅଧିକ ଗବେଷଣା ପ୍ରଫେସର ଯାଙ୍ଗ ସିୟୁକିଙ୍କ ଅଧୀନରେ କରିବେ । ବ୍ରହ୍ମପୁର ବିଶ୍ଵବିଦ୍ୟାଳୟ ବିଭାଗର ମୃତ୍ୟୁଞ୍ଜୟ ଜେନାଙ୍କ ଅଧୀନରେ ସେ ଗବେଷଣା କରିଆସୁଛନ୍ତି । ବିଶ୍ବଜିତ ଏଭଳି ସଫଳତାକୁ ନେଇ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ବେଶ ଖୁସି ।
ଆସନ୍ତା ୩ ବର୍ଷ ପାଇଁ ବିଶ୍ବଜିତ ସାଉଥ କୋରିଆର ସଂଗମାୟୁଙ୍ଗ ୟୁନିଭରସିଟିରେ ରହିବେ । ସେଠାରେ ପୋଷ୍ଟ ଡକ୍ଟରେଟ ପାଇଁ ଏଭଳି ଗବେଷଣା କରିବେ । ପୂର୍ବରୁ ବିଶ୍ବଜିତ ମୁଖ କର୍କଟ ରୋଗର ନିବାରଣ ଶକ୍ତି ବିଷୟରେ ବି କରିଥିଲେ ଗବେଷଣା । କିନ୍ତୁ ଆଗାମୀ ଦିନରେ ଅନ୍ୟ କର୍କଟ ରୋଗ ପ୍ରତିରୋଧକ ଔଷଧ ଜ୍ଞାନ କୌଶଳ ପାଇଁ ସେ କାର୍ଯ୍ୟ କରିବେ । ଦୃଢ ଇଚ୍ଛା ଶକ୍ତି ଓ କଠିନ ପରିଶ୍ରମ ପାଇଁ ତାଙ୍କୁ ଏ ସଫଳତା ମିଳିଛି ।
ବିଶ୍ୱଜିତଙ୍କୁ ୩ ଟି ଦେଶର ବିଶ୍ବ ବିଦ୍ୟାଳୟରୁ ଅଧିକ ଗବେଷଣା ପାଇଁ ସୁଯୋଗ ମିଳିଥିଲା । କିନ୍ତୁ ସେ ସାଉଥ କୋରିଆର ସଂଗମାୟୁଙ୍ଗ ବିଶ୍ୱବିଦ୍ୟାଳୟକୁ ବାଛିଥିଲେ । ଅନୁଗୁଳର ମାନ୍ଧତା ଗାଁରେ ବିଶ୍ବଜିତଙ୍କ ଘର । ବାପା କୌରବ ଚନ୍ଦ୍ର ଓ ମାଆ ସୌଭାଗିନି ପୁଅର ଏଭଳି କୃତିତ୍ବ ନେଇ ବେଶ ଖୁସିଥିବା କହିଛନ୍ତି । ବିଶ୍ୱଜିତ ଚଳିତବର୍ଷ ବ୍ରହ୍ମପୁର ବିଶ୍ଵବିଦ୍ୟାଳୟରୁ ଡକ୍ଟରେଟ ଉପାଧି ମଧ୍ୟ ପାଇଥିଲେ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
