ବ୍ରହ୍ମପୁର: ପଞ୍ଚାୟତ ନିର୍ବାଚନରେ ଯୁବପିଢିଙ୍କ କ୍ରେଜ ଦେଖିବାକୁ ମିଳିଥିବା ପୌର ଲଢେଇରେ ମଧ୍ୟ ଯୁବ ଚେହେରା ସାମିଲ ହୋଇଛନ୍ତି । ମହାନଗର ନିଗମର ମେୟର ପଦବୀ ପାଇଁ ଆମ୍ ଆଦମୀ ପାର୍ଟିରୁ ପ୍ରାର୍ଥୀପତ୍ର ଦାଖଲ କରିଛନ୍ତି ଖଲ୍ଲିକୋଟ ଏକକ ବିଶ୍ୱବିଦ୍ୟାଳୟରେ ଏମ୍.ବି.ଏ ପାଠ ପଢୁଥିବା ଛାତ୍ରୀ ସି.ପ୍ରିୟଙ୍କା । ଆପର ମୁଖ୍ୟ ଅରବିନ୍ଦ କେଜ୍ରିୱାଲଙ୍କ ମଡେଲକୁ ବ୍ରହ୍ମପୁରରେ କାର୍ଯ୍ୟକାରୀ କରିବା ସହ ସହରରେ ଶିକ୍ଷା, ସ୍ୱାସ୍ଥ୍ୟ ଭଳି ବିଷୟକୁ ଗୁରୁତ୍ୱ ଦେବା ପାଇଁ ନିର୍ବାଚନରେ ପ୍ରତିଦ୍ୱନ୍ଦିତା କରୁଥିବା ବେଳେ ସହରର ବିକାଶ ପାଇଁ ଅନେକ ସ୍ୱପ୍ନ ଦେଖିଥିବା ସେ କହିଛନ୍ତି ।
ସେପଟେ ପ୍ରାର୍ଥୀପତ୍ର ଦାଖଲର ଚତୁର୍ଥ ଦିନରେ ସ୍ଥାନୀୟ ଉପଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଆଠ ଜଣ ପ୍ରାର୍ଥୀ ଓ ପ୍ରାର୍ଥୀନୀ କର୍ପୋରେଟର ପଦବୀ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି । ଚତୁର୍ଥ ଦିନରେ ମୋଟ ୪୬ ଜଣ ପ୍ରାର୍ଥୀ ଫର୍ମ ନେଇଥିବା ବେଳେ ଏଥିରେ ୪୪ ଜଣ କର୍ପୋରେଟର ଏବଂ ଦୁଇ ଜଣ ମେୟର ପଦବୀ ପାଇଁ ଫର୍ମ ନେଇଥିବା ଜଣାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
