ବ୍ରହ୍ମପୁର: ଆସୁଛି ବର୍ଷା ଦିନ। ଏନେଇ ବଢିଗଲାଣି ବ୍ରହ୍ମପୁରବାସୀଙ୍କ ସଫେଇ ଚିନ୍ତା। କାରଣ ସାମାନ୍ୟ ବର୍ଷା ହେଲେ ସହରରେ ଜମା ହୁଏ କୁଢକୁଢ ଅଳିଆ ଆବର୍ଜନା । ନାଳ ନର୍ଦ୍ଧମାର ଜଳ ମୁଖ୍ୟ ରାସ୍ତା ଉପରେ ଭାସିବା ସହ ସହରରେ ସୃଷ୍ଟି ହୋଇଥାଏ କୃତ୍ରିମ ବନ୍ୟା ପରିସ୍ଥିତି। ବର୍ତ୍ତମାନ ପରିସ୍ଥିତିରେ ବହୁ ପୁରାତନ ନାଳ ଗୁଡିକ ଭାଙ୍ଗିରୁଜି ଯିବାରୁ ସହରର ବହୁ ପ୍ରମୁଖ ରାସ୍ତାରେ ଆଣ୍ଠୁଏ ଆଣ୍ଠୁଏ ପାଣି ଜମିରହିଥାଏ ।
ପୂର୍ବରୁ ଅନେକ ଥର ଲଗାଣବର୍ଷାକୁ ନେଇ ବେହାଲ ହୋଇଛି ବ୍ରହ୍ମପୁର ସହର । ସହରରେ ପ୍ରମୁଖ ନାଳ ନର୍ଦ୍ଧମାର ଜଳ ବିଭିନ୍ନ ମୁଖ୍ୟ ରାସ୍ତା ସହ ଅନେକ ଘରେ ପଶିଥିବା ନଜିର ରହିଛି। ତେବେ ଗତ କିଛି ମାସ ମଧ୍ୟରେ ନିଗମ ପକ୍ଷରୁ ଅନେକ ସଫେଇ କାର୍ଯ୍ୟ ହାତକୁ ନିଆଯାଇଥିବା ବେଳେ ପାଣି ଜମିରହୁଥିବା ସ୍ଥାନ ଗୁଡିକ ଯୁଦ୍ଧକାଳୀନ ଭିତ୍ତିରେ ସଫେଇ କରିବାକୁ ସହରବାସୀ ଦାବୀ କରିଛନ୍ତି ।
ସେପଟେ ବର୍ଷା ଦିନ ପୁର୍ବରୁ ନିଗମର ପରିମଳ ବ୍ୟବସ୍ଥା ପ୍ରତି ଗୁରୁତ୍ବ ଦିଆଯାଉଥିବା କହିଛନ୍ତି ଜିଲ୍ଲାପାଳ। ତେବେ ବର୍ଷା ଦିନ ପୁର୍ବରୁ ପ୍ରଶାସନ ପକ୍ଷରୁ ପରିମଳ ବ୍ୟବସ୍ଥାରେ ସୁଧାର ଆଣିବା ପାଇଁ ପ୍ରଣୟନ ହୋଇଥିବା ଯୋଜନା କେତେ କାର୍ଯ୍ୟକାରୀ ହେବ ତାହା ଦେଖିବାକୁ ବାକି ରହିଲା ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
