ବ୍ରହ୍ମପୁର: ଦେଖିବାକୁ ଶିଶୁ ଭଳି । ହେଲେ ବୟସ ଛୁଇଁଲାଣି ୨୦ । ପିଲାଟି ବେଳେ ଅତ୍ୟନ୍ତ ସୁନ୍ଦର ରହିଥିବାରୁ ପରିବାର ବର୍ଗ ନାମ ରଖିଥିଲେ ରାଣୀ । ହସଖୁସିରେ ବିତୁଥିବା ରାଣୀର ଜୀବନରେ ସତେଯେପରି ଘୋଟି ଆସିଥିଲା କଳାବାଦଲ । ପ୍ରଥମେ ବାପା ଏବଂ ପରେ ମାଆ ଚାଲିଯାଇଥିବା ବେଳେ ଶରୀରର ରୋଗ ବୃଦ୍ଧି ପାଇବା ଦେଖି ହାତ ଛାଡି କେଉଁ ଆଡେ ଚାଲିଯାଇଛି ସାନ ଭାଇ । ଏଭଳି ସମୟରେ ବ୍ରହ୍ମପୁର ସହରରୁ ଅସହାୟ ଅବସ୍ଥାରେ ଉଦ୍ଧାର କରି ବ୍ରହ୍ମପୁର MKCG ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରିଥିଲେ କିଛି ସ୍ବେଚ୍ଛାସେବୀ । ଗତ ଦୁଇ ସପ୍ତାହ ଧରି ପଡିରହିଥିବା ରାଣୀର ଚିକିତ୍ସା ପାଇଁ ଆଗେଇ ଆସିଛନ୍ତି ପ୍ରଶାସନ ଓ ଡାକ୍ତରୀ ଟିମ ।
ଏମ.କେ.ସି.ଜି ମେଡିକାଲର ଅସ୍ଥିଶଲ୍ୟ ବିଭାଗରେ ଚିକିତ୍ସିତ ହେଉଛି 20 ବର୍ଷୟା ଯୁବତୀ ନିଲିମା ମହାରଣା ଓରଫ ରାଣୀ । ବିଭିନ୍ନ ରୋଗରେ ଆକ୍ରାନ୍ତ ହୋଇଥିବା ଏହି ଯୁବତୀ ଜଣକ ଦେଖାଯାଉଛନ୍ତି ଜଣେ ଶିଶୁ ଭଳି । ପିଲାଟି ଦିନରୁ ଅତ୍ୟନ୍ତ ସୁନ୍ଦର ରହିଥିବାରୁ ପରିବାର ବର୍ଗ ରାଣୀ ବୋଲି ନାମକରଣ କରିଥିଲେ । ହେଲେ ପରବର୍ତ୍ତୀ ସମୟରେ ରାଣୀ ପାଇଁ ଆସିଛି କେବଳ ଦୁଃଖ ପରେ ଦୁଃଖ । ପିଲାଟି ଦିନରୁ ନିଜର ବାପାକୁ ହରାଇଥିବା ବେଳେ ଷଷ୍ଠ ଶ୍ରେଣୀରେ ପାଠ ପଢାରେ ଶେଷରେ ତାକୁ ଡୋରି ବାନ୍ଧିବାକୁ ପଡିଥିଲା । ଆଉ ଏଭଳି ସମୟରେ ନିଜ ମାଆଙ୍କ ସହିତ ମିଳିତ ଭାବରେ କୌଣସି ସ୍ଥାନରେ କାର୍ଯ୍ୟ କରି ପରିବାର ଚଳାଇ ଆସୁଥିବା ବେଳେ ଏଭଳି ସମୟରେ ମାଆଙ୍କର ମୃତ୍ୟୁ ଘଟିଥିଲା ।
ଆଉ ଏହା ପରେ ନିଜ ପାଖରେ ରହୁଥିବା ସାନ ଭାଇ ଜାଣିପାରିଥିଲା ରାଣୀ ବିଭିନ୍ନ ରୋଗରେ ଆକ୍ରାନ୍ତ ହୋଇଛି । ଏଥିପାଇଁ ସେ ବ୍ରହ୍ମପୁର ସହରରେ ଭଭଣୀର ମଧ୍ୟ ହାତ ଛାଡି କେଉଁଆଡେ ଚାଲିଯାଇଛି । ଆଉ ଶେଷରେ ଏବେ ରାଣୀ ଏମ.କେ.ସି.ଜି ର ଶଯ୍ୟାରେ ଶୋଇ ରହି କେବେ ସେ ସୁସ୍ଥ ହୋଇ ଫେରିବ ତାହାକୁ ନେଇ ଅପେକ୍ଷା କରିବା ସହିତ ଏକାକୀ ଜାରି ରଖିଛି ନିଜର ସଂଗ୍ରାମ । ଆଉ ଏଭଳି ସମୟରେ ରାଣୀକୁ ସହଯୋଗ କରିବାକୁ ହାତ ବଢାଇଛି ଜିଲ୍ଲା ପ୍ରଶାସନ ।
