ନୂଆଦିଲ୍ଲୀ: ନିର୍ବାଚନ ପୂର୍ବରୁ କୃଷକଙ୍କୁ ଖୁସ କରିବା ପ୍ରୟାସ । ଅନ୍ନଦାତାଙ୍କୁ ଏକ ସୁନିଶ୍ଚିତ ଆୟ ଯୋଗାଇବାକୁ ଲାଗିପଡିଛନ୍ତି ମୋଦି ସରକାର । ପିଏମ କିସାନ ସମ୍ମାନ ନିଧି ଯୋଜନା ଜରିଆରେ ଚାଷୀଙ୍କୁ ବାଣ୍ଟିଚାଲିଛନ୍ତି ଟଙ୍କା । ପ୍ରଥମ ପର୍ଯ୍ୟାୟରେ ମାତ୍ର 37ଦିନରେ 2କୋଟି 60ଲକ୍ଷ କ୍ଷୁଦ୍ର ଓ ନାମମାତ୍ର ଚାଷୀ ବ୍ୟାଙ୍କ ଆକାଉଣ୍ଟକୁ 5,215କୋଟି ଟଙ୍କା ପଠାଯାଇଛି ।
ମୋଦିଙ୍କ ପିଏମ କିଶାନଲିଷ୍ଟରେ ଓଡିଶାର ମଧ୍ୟ ଲକ୍ଷ ଲକ୍ଷ ଚାଷୀ ରହିଛନ୍ତି । ପ୍ରଥମ ପର୍ଯ୍ୟାୟରେ ପ୍ରାୟ 8 ଲକ୍ଷ ଚାଷୀଙ୍କୁ 2 ହଜାର ଟଙ୍କା ଲେଖାଏଁ ଟଙ୍କା ପ୍ରଦାନ କରାଯାଇଛି ।
ଫେବୃଆରୀ ପହିଲାରେ ପୀୟୁଷ ଗୋୟଲ ସଂସଦରେ ଉପସ୍ଥାପିତ କରିଥିଲେ 2019-20 ଅନ୍ତରୀଣ ବଜେଟ । ଏଥିରେ କୃଷକ ଉଜ୍ଝଳ ଭବିଷ୍ୟତ ମନାସୀ ସରକାର ପିଏମ- କିଶାନର ଘୋଷଣା କରିଥିଲେ । ନିର୍ବାଚନ ପୂର୍ବ ପାଖାପାଖି 75 ହଜାର କୋଟି ଟଙ୍କାର ବ୍ୟୟ ଅଟକଳ ଧାର୍ଯ୍ୟ ହୋଇଛି ।
ଫେବୃଆରୀ 24ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉତ୍ତରପ୍ରଦେଶର ଗୋରଖପୁରରେ ଏହି ଯୋଜନାର ଶୁଭାରମ୍ଭ କରି ପ୍ରଥମ କିସ୍ତି ଟଙ୍କା ବାଣ୍ଟିବା ପ୍ରକ୍ରିୟା ଆରମ୍ଭ କରିଥିଲେ । ମାର୍ଚ୍ଚ ଶେଷ ସୁଦ୍ଧା କୃଷକଙ୍କୁ ପ୍ରଥମ କିସ୍ତି ଟଙ୍କା ଦିଆଯିବ । ଏହି ଯୋଜନା ଘୋଷଣାର 37 ଦିନ ମଧ୍ୟରେ 2.6 କୋଟି ଚାଷୀଙ୍କୁ 5,215କୋଟି ଟଙ୍କା ସ୍ଥାନନ୍ତରଣ କରାଯାଇଥିବା ନେଇ ପିଏମଓ ଇଣ୍ଡିଆ ପକ୍ଷରୁ ଟ୍ବିଟ କରାଯାଇଛି ।
ଏହି ସ୍କିମ ଅଧିନରେ 2 ହେକ୍ଟର ଜମି ଥିବା ଚାଷୀଙ୍କୁ ବାର୍ଷିକ 6000 ଟଙ୍କା ଦିଆଯିବ । ଏହି ଟଙ୍କା 3ଟି କିସ୍ତିରେ ପ୍ରଦାନ କରାଯିବ । କୃଷି କ୍ଷେତ୍ରରେ ଥିବା ସମସ୍ୟାର ସମାଧାନ ଓ ଚାଷୀଙ୍କୁ ଆର୍ଥିକ କ୍ଷେତ୍ରରେ ସୁଦୃଢ କରିବାକୁ ସରକାରଙ୍କ ଏହି ପ୍ରଚେଷ୍ଠା ।
