ନୂଆଦିଲ୍ଲୀ: ଭାରତୀୟ ଅର୍ଥବ୍ୟବସ୍ଥା ଆକାର 2020ରେ 3.1 ପ୍ରତିଶତ ହ୍ରାସ ପାଇପାରେ । କ୍ରେଡିଟ ରେଟିଂ ଏଜେନ୍ସି ମୁଡିସ ଇନଭେଷ୍ଟର୍ସ ସର୍ଭିସ ଏ ନେଇ ଅନୁମାନ କରିଛି ।
ଭାରତ ଓ ଚୀନ ମଧ୍ୟରେ ସୀମା ବିବାଦ ଯୋଗୁଁ ଏସିଆର ଭୌଗଳିତ ସ୍ଥିତିରେ ପରିବର୍ତ୍ତନ ଆସିବା ନେଇ ସମ୍ଭାବନା ରହିଛି ବୋଲି ଏଜେନ୍ସି ଆଶଙ୍କା ପ୍ରକାଶ କରିଛି । ଏହା ପୂର୍ବରୁ ମୁଡିସ ଏପ୍ରିଲରେ ଭାରତର ମୋଟ ଘରୋଇ ଉତ୍ପାଦ(ଜିଡିପି)ରେ 2020ରେ 0.2 ପ୍ରତିଶତ ବୃଦ୍ଧି ନେଇ ଆକଳନ କରିଥିଲା ।
ହେଲେ କୋରୋନା ଭାଇରସ ସଂକ୍ରମଣ ଓ ଲକଡାଉନ ପ୍ରଭାବକୁ ନଜରରେ ରଖି ମୁଡିସ ନିଜ ଅନୁମାନରେ ସଂଶୋଧନ କରିଛି । ମୁଡିସ ମୁତାବକ 2021ରେ ଭାରତୀୟ ଅର୍ଥବ୍ୟବସ୍ଥାରେ ଅଭିବୃଦ୍ଧି ଫେରିବ । ଏଥିସହ 6.9 ପ୍ରତିଶତ ହାରରେ ବୃଦ୍ଧି ରେକର୍ଡ ହୋଇପାରେ ।
ମୁଡିସ ଗ୍ଲୋବାଲ ମାକ୍ରୋ ଆଉଟଲୁକ(2020-21)ର ଜୁନ ଅପଡେଟରେ କହିଛି କି, ଭାରତର 2020 ବୃଦ୍ଧି ପୂର୍ବାନୁମାନକୁ ସଂଶୋଧିତ କରାଯାଇଛି । କାରଣ ରିପୋର୍ଟରୁ ଜାନୁଆରୀ-ମାର୍ଚ୍ଚ ଓ ଏପ୍ରିଲ-ଜୁନ ତ୍ରୟମାସରେ କୋରୋନା ମହାମାରୀରୁ ଉତ୍ପନ୍ନ ବ୍ୟବଧାର ପ୍ରଭାବ ଜଣାପଡୁଛି ।
