ନୂଆଦିଲ୍ଲୀ: ଏବେ ଟାଟା ହାତରେ ଏୟାର ଇଣ୍ଡିଆ । ଦୀର୍ଘ ୬୮ ବର୍ଷ ପରେ ପୁଣି ଟାଟା ପାଖକୁ ଫେରିଛି ଏୟାର ଇଣ୍ଡିଆ ବିମାନ । ୧୮ ହଜାର କୋଟିର ସବୁଠୁ ବଡ ବିଡ୍ ସହ ନୂଆ ମାଲିକ ସାଜିଛି Tata sons । ଏୟାର ଇଣ୍ଡିଆ ଅତ୍ୟଧିକ ଋଣଗ୍ରସ୍ତ ଥିବା କାରଣରୁ ସରକାର ଏହାକୁ ବିକ୍ରୟ କରିବାକୁ ଚାହୁଁଥିଲେ । ଶେଷରେ ଏହି ଉଦ୍ୟମ ସଫଳ ହୋଇଛି । ତେବେ ଦୀର୍ଘ ବର୍ଷ ଧରି ଲାଭରେ ଉଡାଣ ଭରିବା ସତ୍ତ୍ବେ ବି କାହିଁକି ଏୟାର ଇଣ୍ଡିଆର ଘରୋଇକରଣ ହେଲା ଏବଂ କେମିତି ଋଣରେ ବୁଡିଲା କମ୍ପାନୀ ? ଏହା ପଛରେ ଏକ ବଡ କାହାଣୀ ରହିଛି ।
ଏୟାର ଇଣ୍ଡିଆ ଉପରେ ଋଣ ବଢିବା ସହ ପ୍ରଥମେ ପ୍ରଥମେ ଏହାକୁ ଋଣମୁକ୍ତ କରିବାକୁ ପ୍ରୟାସ କରାଯାଇଥିଲା । ହେଲେ ଏହା ସଫଳ ହୋଇନଥିଲା । ବଦଳରେ ବର୍ଷକୁ ବର୍ଷ କ୍ଷତି ବଢିବାରେ ଲାଗିଲା । ଯେଉଁ ଯେଉଁ କମ୍ପାନୀ ଋଣରେ ବୁଡି ରହିଲା, ସରକାର ମଧ୍ୟ ଏହାଠାରୁ ଦୂରେଇ ରହିଲେ । ପ୍ରାରମ୍ଭିକ ସମୟରେ ଏୟାର ଇଣ୍ଡିଆର କିଛି ସେୟାର ବିକ୍ରି କରିବାର ଯୋଜନା ରହିଥିବା ସାମ୍ନାକୁ ଆସିଥିଲା । ହେଲେ ପରେ ସରକାର ସ୍ପଷ୍ଟ କରିଥିଲେ ଯେ ବିମାନ ଉଡାଣ କାର୍ଯ୍ୟ ସରକାରଙ୍କ ନୁହେଁ । ତେଣୁ ଏହାକୁ ସମ୍ପୂର୍ଣ୍ଣ ବିକ୍ରୟ କରାଯିବ । ଋଣଗ୍ରସ୍ତ ଏୟାର ଇଣ୍ଡିଆର ବିକ୍ରି ପାଇଁ ସରକାର ଅନେକ ଥର ବିଡ୍ ଡାକିଥିଲେ । ହେଲେ ଋଣଗ୍ରସ୍ତ ଏହି ବିମାନ କମ୍ପାନୀକୁ କିଣିବା ପାଇଁ କେହି କ୍ରେତା ମିଳୁନଥିଲେ । ଶେଷରେ ଟାଟା ଏହାକୁ କିଣିଛି ।
ସୂଚନା ମୁତାବକ, ୨୦୨୧ ଅଗଷ୍ଟ ୩୧ ଯାଏଁ ଏୟାର ଇଣ୍ଡିଆ ଉପରେ ମୋଟ ୬୧, ୫୬୨ କୋଟିର ଋଣ ରହିଥିଲା । ବର୍ତ୍ତମାନ ଟାଟା ଏହି କମ୍ପାନୀ ଉପରୁ ୧୫, ୩୦୦ କୋଟିର ବୋଝ ହାଲୁକା କରିଛି । ଟାଟା ଦ୍ବାରା ଋଣ କମ୍ ହେବା ପରେ ଏବେ ଏୟାରଇଣ୍ଡିଆ ଉପରେ ୪୬, ୨୬୧ କୋଟି ଟଙ୍କା ରହିଛି ।
କିପରି ଋଣଗ୍ରସ୍ତ ହେଲା ଏୟାରଇଣ୍ଡିଆ:
ଗୋଟିଏ ଦଶକ ପୂର୍ବରୁ ଏୟାର ଇଣ୍ଡିଆ ଏଭଳି ଆର୍ଥିକ ସଙ୍କଟ ଦେଇ ଗତି କରିବ ବୋଲି କେହି କଳ୍ପନା ମଧ୍ୟ କରିନଥିଲେ । ଏକ ଦଶକ ପୂର୍ବରୁ ଏହି ସରକାରୀ ଏୟାରଲାଇନ କମ୍ପାନୀ ଲାଭରେ ଚାଲୁନଥିଲା କିନ୍ତୁ ଏହା ଆଗକୁ ଲାଭ ହାସଲ କରିବ ବୋଲି ଆଶାପୋଷଣ କରାଯାଉଥିଲା । ୧୯୫୪ ମସିହାରେ ବିମାନ କମ୍ପାନୀର ରାଷ୍ଟ୍ରୀୟକରଣ ହୋଇଥିଲା । ସେହି ସମୟରେ ବିମାନ ସେବା ପାଇଁ କେନ୍ଦ୍ର ସରକାର ଦୁଇଟି କମ୍ପାନୀ ନିର୍ମାଣ କରିଥିଲେ । ଘରୋଇ ସେବା ପାଇଁ ଇଣ୍ଡିଆନ ଏୟାରଲାଇନ ଏବଂ ବିଦେଶ ପାଇଁ ଏୟାର ଇଣ୍ଡିଆ । ସେବେଠାରୁ ୨୦୦୦ ମସିହା ଯାଏଁ ସରକାରୀ ଏୟାରଲାଇନ ଖୁବ୍ ଲାଭରେ ଚାଲିଥିଲା ।
ଏହାପରେ ପ୍ରଥମ ଥର ୨୦୦୧ ମସିହାରେ କମ୍ପାନୀ ୫୭ କୋଟି ଟଙ୍କା କ୍ଷତି ସହିଥିଲା । ସେହି ସମୟରେ ବିମାନ ଚଳାଚଳ ମନ୍ତ୍ରଣାଳୟ ତତ୍କାଳନୀ ପରିଚାଳନା ନିର୍ଦ୍ଦେଶକ ମାଇକେଲ ମାସ୍କ୍ୟୁରେହାନସଙ୍କୁ ଏନେଇ ଦୋଷୀ ମାନିବା ସହ ପଦରୁ ହଟିଥିଲେ । ୨୦୦୭ରେ ଏୟାର ଇଣ୍ଡିଆକୁ ଇଣ୍ଡିଆନ ଏୟାରଲାଇନ ସହ ମିଶ୍ରଣ କରାଯାଇଥିଲା । ଦୁଇ କମ୍ପାନୀର ମିଶ୍ରଣ ସମୟରେ କ୍ଷତି ରାଶି ମୋଟ ୭୧୧କୋଟି ଟଙ୍କା ଥିଲା । ମିଶ୍ରଣ ପୂର୍ବରୁ ଇଣ୍ଡିଆନ ଏୟାରଲାଇନ ପ୍ରାୟ ୨୩୦ କୋଟି ଟଙ୍କାର କ୍ଷତି ସହିଥିବା କୁହାଯାଉଥିଲା । ଦୁଇ ଏୟାରଲାଇନକୁ ଏକାଠି କରିବା ପରେ ଏହା ଖୁବଶୀଘ୍ର ଲାଭ ହାସଲ କରିବ ବୋଲି ଆଶା କରାଯାଉଥିଲା । ଯେତେବେଳେ କି ଏୟାର ଇଣ୍ଡିଆ ୫୪୧ କୋଟିର କ୍ଷତିରେ ବୁଡିଥିଲା ।
ତେବେ ଦୁଇ କମ୍ପାନୀକୁ ମିଶାଇ ଯେଉଁ ଗୋଟିଏ କମ୍ପାନୀ ହେବ ତାହା ବାର୍ଷିକ ୬ ବିଲିୟନ ଲାଭ କମାଇବ ବୋଲି କମ୍ପାନୀର ମିଶ୍ରଣ ପୂର୍ବରୁ ଦୃଢୋକ୍ତି ପ୍ରକାଶ ପାଇଥିଲା । ହେଲେ ସମୟ ବଢିବା ସହ ଏହାର ଓଲଟା ଫଳ ମିଳିଥିଲା । କ୍ଷତି ଭରଣା କରିବାକୁ କମ୍ପାନୀ ଲୋନ ନେବା ଆରମ୍ଭ କରିଦେଲା । ଯାହା କମ୍ପାନୀକୁ ହଜାର ହଜାର କୋଟିର ଋଣରେ ବୁଡାଇଥିଲା ।
୨୦୦୭-୦୮ ବର୍ଷରେ କମ୍ପାନୀ ଉପରେ ଲୋନ ପରିମାଣ ୨,୨୨୬ କୋଟି ଥିବାବେଳେ ୨୦୦୮-୦୯ ଯାଏଁ ଏହା ୭,୨୦୦ କୋଟି ଏବଂ ୨୦୦୯-୧୦ ସୁଦ୍ଧା ବଡ ଧରଣର ବୃଦ୍ଧି ସହ ୧୨,୦୦୦ କୋଟିରେ ପହଞ୍ଚିଥିଲା । ଏହି ଋଣର ପରିମାଣ ଆହୁରି ଅଧିକ ମଧ୍ୟ ହୋଇଥାନ୍ତା, ମାତ୍ର ଋଣ ପରିଶୋଧ କରିବାକୁ ଏୟାରଇଣ୍ଡିଆ ୨୦୦୯ରେ ନିଜର କିଛି ବିମାନକୁ ବିକ୍ରି କରିଦେଇଥିଲା ।
ଏକ ମିଡିଆ ରିପୋର୍ଟରେ କୁହାଯାଇଛି କି, ୨୦୦୫ରେ ୧୧୧ଟି ବିମାନ କ୍ରୟ କରିବା ପାଇଁ ଏୟାର ଇଣ୍ଡିଆର ନିଷ୍ପତ୍ତି ଏହି ଆର୍ଥିକ ସଙ୍କଟର ସବୁଠୁ ବଡ କାରଣ ଥିଲା । ଏହି ଡିଲ୍ ପାଇଁ ୭୦ ହଜାର କୋଟି ଟଙ୍କା ଖର୍ଚ୍ଚ ହୋଇଥିଲା । କମ୍ପାନୀର କାଜୁଆଲ ମନୋଭାବ ମଧ୍ୟ ବର୍ବାଦିର ଅନ୍ୟତମ କାରଣ ଥିଲା । ସେହିପରି ୨୦୧୮ ଯାଏଁ କମ୍ପାନୀ ପାଖରେ ମାତ୍ର ୧୩.୩ ପ୍ରତିଶତ ମାର୍କେଟ ସେୟାର ଥିବା ମଧ୍ୟ ସୂଚନା ମିଳିଛି ।
ଏଥିସହ ଘରୋଇ ଏୟାରଲାଇନ କମ୍ପାନୀଗୁଡିକର ଫ୍ଲାଇଟ ଦିନରେ ଅତିକମରେ ୧୪ ଘଣ୍ଟା ଆକାଶ ମାର୍ଗରେ ଥାଆନ୍ତି । ଯେତେବେଳେ କି ଏୟାର ଇଣ୍ଡିଆ ଫ୍ଲାଇଟ ପ୍ରାୟ ୧୦ ଘଣ୍ଟା ପାଇଁ ଉଡାଣ ଭରିଥାଏ । ଏପରିକି ଯେଉଁ ରୁଟରେ ଘରୋଇ କମ୍ପାନୀଗୁଡିକ ସେବା ପ୍ରଦାନ ପାଇଁ ମନା କଲେ ସେହି ରୁଟରେ ଏହି ଏୟାରଲାଇନ୍ସ ଉଡାଣ ଭରିଲା । ସରକାରୀ ପରିଚାଳନାଗତ ତ୍ରୁଟି ଏୟାରଇଣ୍ଡିଆର ଆର୍ଥିକ ଦୂରାବସ୍ଥା ପାଇଁ ମଧ୍ୟ ଦାୟୀ ।
ଉଲ୍ଲେଖଯୋଗ୍ୟ, ସର୍ବପ୍ରଥମେ ୧୯୩୨ ମସିହାରେ ଜେଆରଡି ଟାଟା ଏୟାର ଇଣ୍ଡିଆକୁ ଟାଟା ଏୟାରଲାଇନ୍ସ ନାଁରେ ଲଞ୍ଚ କରିଥିଲେ । ହେଲେ ୧୯୪୬ ମସିହାରେ ଏହାର ନାମ ବଦଳାଯାଇ ଏୟାର ଇଣ୍ଡିଆ କରାଯାଇଥିଲା ଏବଂ ୧୯୫୩ରେ ସରକାର ଟାଟା ପାଖରୁ ଏହାକୁ କ୍ରୟ କରିଥିଲେ ।
ସ୍ବାଧୀନତା କାଳରେ ଭାରତରେ ପ୍ରାୟ ୯ଟି ଛୋଟ ବଡ ଏୟାରଲାଇନ୍ସ ରହିଥିଲା । ୧୯୫୪ରେ କମ୍ପାନୀଗୁଡିକର ରାଷ୍ଟ୍ରୀୟକରଣ ହୋଇଥିଲା । ସବୁ କମ୍ପାନୀକୁ ମିଶ୍ରଣ କରି ଦୁଇଟି କମ୍ପାନୀ ଯଥା ଇଣ୍ଡିଆନ ଏୟାରଲାଇନ୍ସ ଏବଂ ଏୟାରଇଣ୍ଡିଆ ତିଆରି କରାଯାଇଥିଲା ।
