ନୂଆଦିଲ୍ଲୀ: ଯଦି ସରକାର ସହଯୋଗ କରିବେନି, ତେବେ ବନ୍ଦ ହୋଇଯିବ ଦେଶର ତୃତୀୟ ସର୍ବବୃହତ୍ତ ମୋବାଇଲ ସେବା ପ୍ରଦାନକାରୀ କମ୍ପାନୀ ଭୋଡାଫୋନ ଓ ଆଇଡିଆ । ଶୁକ୍ରବାର ହିନ୍ଦୁସ୍ଥାନ ଟାଇମ୍ସ ଲିଡରସିପ ସମିଟରେ ଏ ନେଇ କମ୍ପାନୀର ଅଧ୍ୟକ୍ଷ କୁମାର ମଙ୍ଗଳମ ବିର୍ଲା ସ୍ପଷ୍ଟ କରିଛନ୍ତି ।
ସେ କହିଛନ୍ତି ଯେ, ‘ଯଦି ଆମେ ମାଗିଥିବା ଆର୍ଥିକ ପ୍ୟାକେଜ ନ ଦିଅନ୍ତି , ‘ତେବେ ଆମ ଦୋକାନ(ଭୋଡାଫୋନ-ଆଇଡିଆ) ବନ୍ଦ କରିବାକୁ ହେବ ।
ଆର୍ଥିକ ସଙ୍କଟରେ ବୁଡିରହିଥିବା ଏହି ଟେଲିକମ କମ୍ପାନୀର ଆଗାମୀ ରଣନୀତି କଣ ରହିଛି ? ତାର ଜବାବରେ ମଙ୍ଗଳମ ଏଭଳି ଉତ୍ତର ଦେଇଛନ୍ତି । ଏଥିରୁ ସ୍ପଷ୍ଟ ଯେ, ସରକାରଙ୍କ ଆର୍ଥିକ ସହାୟତା ନ ମିଳିଲା ପର୍ଯ୍ୟନ୍ତ କମ୍ପାନୀ କୌଣସି ପ୍ରକାର ନିବେଶ କରିବାକୁ ପ୍ରସ୍ତୁତ ନୁହେଁ । କାରଣ ସେ ନିଜେ କହିଛନ୍ତି ଯେ, ବୁଡୁଥିବା ଟଙ୍କାରେ ଆଉ ଖର୍ଚ୍ଚ କରିବା ବ୍ୟର୍ଥ । ଆଗକୁ ଇନ୍ସଲଭେନ୍ସି ଆଣ୍ଡ ବ୍ୟାଙ୍କରପ୍ସି କୋଡ୍(ଆଇବିସି)ରେ ଅଧିନରେ କମ୍ପାନୀ ଦେବାଳିଆ ଘୋଷିତ ହେବ ।
ସୁପ୍ରିମକୋର୍ଟଙ୍କ ପକ୍ଷରୁ ଏଜିଆର ଉପରେ ନିଆଯାଇଥିବା ନିଷ୍ପତ୍ତିର ସବୁଠୁ ଅଧିକ ପ୍ରଭାବ ଭୋଡାଫୋନ ଓ ଆଇଡିଆ ଉପରେ ପଡିଛି । ଏଥିଯୋଗୁଁ କମ୍ପାନୀର ଦ୍ବିତୀୟ ତ୍ରୈୟମାସରେ 50 ହଜାର କୋଟି ଟଙ୍କାରୁ ଅଧିକ ଘାଟା ହୋଇଛି । ଏଥିଯୋଗୁଁ ବିର୍ଲାଙ୍କ ସମ୍ପତ୍ତି ମଧ୍ୟ ଗତ 2 ବର୍ଷରେ ବିପୁଳ ମାତ୍ରାରେ ହ୍ରାସ ପାଇଛି ।
