ନୂଆଦିଲ୍ଲୀ: ଦେଶରେ ବେକାରୀ ହାର ପ୍ରାକ ଲକଡାଉନ ସ୍ତରକୁ ଖସିଛି । ଜୁନ 21ରେ ସମାପ୍ତ ସପ୍ତାହରେ ଭାରତ ବେକାରୀ ହାର 8.5 ପ୍ରତିଶତ ରହିଛି । ଯେତେବେଳେ କି ଏପ୍ରିଲ 5 ରେ ଏହା 23.38 ଓ ମେ 11ରେ ସର୍ବାଧିକ 24 ପ୍ରତିଶତରେ ପହଞ୍ଚିଥିଲା ।
କୋରୋନା ସଂକ୍ରମଣ ରୋକିବାକୁ ଦେଶରେ ଜାରି ଲକଡାଉନ ପ୍ରଭାବରେ ଲକ୍ଷାଧିକ ଲୋକ ନିଯୁକ୍ତି ହରାଇଛନ୍ତି । ହେଲେ ଜୁନ ମାସରେ ଲକଡାଉନ ସାମାନ୍ୟ କୋହଳ ସହ ଆର୍ଥିକ ଗତିବିଧି ଆରମ୍ଭ ହୋଇଛି । ଯାହା ଫଳରେ ଜୁନ ତୃତୀୟ ସପ୍ତାହରେ ବେକାରୀ ହାରରେ ବଡ ଧରଣର ହ୍ରାସ ଦେଖିବାକୁ ମିଳିଛି । ସେଣ୍ଟର ଫର ମନିଟରିଂ ଇଣ୍ଡିଆନ ଇକୋନୋମି(ସିଏମଆଇଇ ) ଏ ନେଇ ମଙ୍ଗଳବାର ନିଜ ସାପ୍ତାହିକ ରିପୋର୍ଟରେ ପ୍ରକାଶ କରିଛି ।
ଗ୍ରାମୀଣ ଲୋକଙ୍କୁ ମିଳିଛି ସହରଠୁ ଅଧିର ରୋଜଗାର
ସିଏମଆର ରିପୋର୍ଟ ମୁତାବକ, ସହରୀ ବେକାରୀ ହାର ଏବେ ବି ପ୍ରାକ କୋଭିଡ ହାର ଠାରୁ ଅଧିକ ଅଛି । ହେଲେ ଗ୍ରାମାଞ୍ଚଳରେ ବେକାରୀ ହାର ହ୍ରାସ ପାଇଛି । ଆଉ ଏହାର କାରଣ ହେଉଛି ମନରେଗା ଓ ସାରା ଦେଶରେ ଖରିଫ ଚାଷ ଆରମ୍ଭ । ଯେଉଁଥିପାଇଁ ଗ୍ରାମାଞ୍ଚଳରେ ଲୋକଙ୍କୁ ରୋଜଗାର ମିଳିରପାରିଛି ।
ଜୁନରେ ବେକାରୀ ଦର
- ପ୍ରଥମ ସପ୍ତାହ - 17.5 ପ୍ରତିଶତ
- ଦ୍ବିତୀୟ ସପ୍ତାହ- 11.6 ପ୍ରତିଶତ
- ତୃତୀୟ ସପ୍ତାହ - 8.5 ପ୍ରତିଶତ
ଭାରତରେ ବେକାରୀ ହାର
- 22 ମାର୍ଚ୍ଚ - 8.41 ପ୍ରତିଶତ
- 5 ଏପ୍ରିଲ - 23.38 ପ୍ରତିଶତ
- 17 ମେ - 24 ପ୍ରତିଶତ
- 21 ଜୁନ - 8.5 ପ୍ରତିଶତ
ସହରାଞ୍ଚଳରେ ବେକାରୀ ହାର
- 22 ମାର୍ଚ୍ଚ - 8.66 ପ୍ରତିଶତ
- 5 ଏପ୍ରିଲ - 30.93 ପ୍ରତିଶତ
- 17 ମେ - 26.95 ପ୍ରତିଶତ
- 21 ଜୁନ- 11.2 ପ୍ରତିଶତ
ଗ୍ରାମୀଣ ବେକାରୀ ହାର
- 22 ମାର୍ଚ୍ଚ -8.3 ପ୍ରତିଶତ
- 5 ଏପ୍ରିଲ - 20.21 ପ୍ରତିଶତ
- 17 ମେ - 22.79 ପ୍ରତିଶତ
- 21 ଜୁନ-7.26 ପ୍ରତିଶତ
ମନରେଗା ଅଧିନରେ 3.3 କୋଟି ପରିବାରକୁ ମିଳିଲା ଲାଭ
ସଏମଆଇଇ ଦର୍ଶାଇଛି କି ମେ ’ ମାସରେ ମନରେଗା ଅଧିନରେ 5.56 ନିୟୁତ ବ୍ୟକ୍ତି ଦିବସ ସୃଷ୍ଟି କରାଯାଇଛି । ଯାହାକି 2019 ମେ ମାସ ତୁଳନାରେ 53 ପ୍ରତିଶତ ଅଧିକ ରହିଛି । ଏଥିସହ ଏହା 2019-20 ମାସିକ ହାରାହାରୀ ଠାରୁ 2.55 ଗୁଣା ଅଧିକ ।
ରିପୋର୍ଟରେ ଦର୍ଶାଯାଇଛି କି ଲକଡାଉନରେ କୋହଳ ଯୋଗୁଁ ବେକାରୀ ହାର କମ ହୋଇପାରିଛି । ଗ୍ରାମୀଣ କ୍ଷେତ୍ରରେ ମନରେଗା ଅଧିନରେ ହେଉଥିବା କାମ ଓ ଖରିଫ ଚାଷ ଯୋଗୁଁ ଅଧିକ ଫାଇଦା ମିଳିଛି ।
ରିପୋର୍ଟ ମୁତାବକ, ଏସବୁ ସ୍କିମ କାରଣରୁ ଏ ବର୍ଷ ମେ ମାସରେ 3.3 କୋଟି ପରିବାରକୁ ମନରେଗା ଫାଇଦା ମିଳିଛି । ଯାହାକି ଗତ ବର୍ଷ ତୁଳନାରେ 55 ପ୍ରତିଶତ ଅଧିକ ।
ମନରେଗା ଓ ଗରିବ କଲ୍ୟାଣ ଯୋଜନାରେ ଓଭରଲ୍ୟାପ
ସିଏମଆଇଇ ନିଜ ରିପୋର୍ଟରେ ଦର୍ଶାଇଛି କି ଗରିବ କଲ୍ୟାଣ ଯୋଜନାର ମନରେଗା ସହ ଓଭରଲ୍ୟାପ ସ୍ପଷ୍ଟ ନାହିଁ । ତଥାପି ଗ୍ରାମାଞ୍ଚଳରେ ବେକାରୀ ହାର ଅତି କମରେ ଅକ୍ଟୋବର ପର୍ଯ୍ୟନ୍ତ କମ ରହିବ ବୋଲି ଆଶା କରାଯାଉଛି । ଏହା ଦ୍ବାରା ଗ୍ରାମାଞ୍ଚଳରେ ଚାହିଦା ମଧ୍ୟ ବଢିପାରେ ।
