ମୁମ୍ବାଇ: ଗତ କିଛି ଦିନ ଧରି କୋରୋନା ସଂକ୍ରମଣ ମାମଲା ହ୍ରାସ ଓ ଆର୍ଥିକ ଗତିବିଧିରେ ସୁଧାର ପ୍ରଭାବରେ ଚମକିଲା ଘରୋଇ ଇକ୍ୟୁଟି ବଜାର । ମଙ୍ଗଳବାର ସେୟାର ବଜାରରେ ବୃଦ୍ଧି ଦେଖାଦେଇଛି । ନିବେଶକଙ୍କ ଧାରଣା ମଜବୁତ ପ୍ରଭାବରେ ସେନସେକ୍ସ ଓ ନିଫ୍ଟି ଉଭୟ ସେୟାର ସୂଚକାଙ୍କ ଉପରମୁହାଁ ରହିଛି ।
ବମ୍ବେ ଷ୍ଟକ ଏକ୍ସଚେଞ୍ଜର 30 ସେୟାର ଆଧାରିତ ସେୟାର ସୂଚକାଙ୍କ ସେନସେକ୍ସ 612.60 ପଏଣ୍ଟ ବଢି 50 ହଜାର ସ୍ତର ପାର କରି 50,193.33 ପଏଣ୍ଟରେ ପହଞ୍ଚିଛି । ସେନସେକ୍ସ ମାର୍ଚ୍ଚ 16 ପରେ ସର୍ବୋଚ୍ଚ ସ୍ତରରେ ପହଞ୍ଚିଛି । ସେହିଭଳି ନ୍ୟାସନାଲ ଷ୍ଟକ ଏକ୍ସଚେଞ୍ଜର 50 ସେୟାର ଆଧାରିତ ନିଫ୍ଟି 184.95 ପଏଣ୍ଟ ଉଛୁଳି 15,000 ପଏଣ୍ଟ ସ୍ତର ଉପର 15,108.10 ପଏଣ୍ଟରେ ବନ୍ଦ ହୋଇଛି ।
ସେନସେକ୍ସରେ ସାମିଲ ସେୟାରରେ ମହିନ୍ଦ୍ରା ଆଣ୍ଡ ମହିନ୍ଦ୍ରା ସବୁଠୁ ଅଧିକ ପ୍ରାୟ 6 ପ୍ରତିଶତ ଚଢିଛି । ବଜାଜ ଅଟୋ , ଟାଇଟନ , ବଜାଜ ଫାଇନାନ୍ସ , ଏଚଡିଏଫସି ବ୍ୟାଙ୍କ ସେୟାର ଲାଭରେ ରହିଛି । ସେପଟେ ଭାରତୀ ଏୟାରଟେଲ , ଆଇଟିସି , ଡା. ରେଡ୍ଡୀଜ ଲ୍ୟାବ ଓ ଷ୍ଟେଟ ବ୍ୟାଙ୍କ ଭଳି ଅନେକ ପ୍ରମୁଖ ସେୟାରର ହ୍ରାସ ଦେଖାଦେଇଛି ।
ଏଥିମଧ୍ୟରେ ବ୍ରେଣ୍ଟ ଅଶୋଧିତ ତୈଳ ଦାମ 0.82 ପ୍ରତିଶତ ବଢି ବ୍ୟାରେଲ ପ୍ରତି 70.03 ଡଲାର ରହିଛି । ଅନ୍ୟପଟେ ବିଦେଶୀ ମୁଦ୍ରା ବିନିମୟ ବଜାରରେ ଟଙ୍କା 17 ପଇସା ସୁଦୃଢ ହୋଇ 73.05 ଡଲାରରେ ପହଞ୍ଚିଛି ।
