ନୂଆଦିଲ୍ଲୀ: ଆପଣ ଭାରତୀୟ ଷ୍ଟେଟ ବ୍ୟାଙ୍କ ଗ୍ରାହକ କି ? ତେବେ ଆପଣଙ୍କ ପାଇଁ ରହିଛି ଖୁସି ଖବର । ଏଣିକି ‘ଜିରୋ ବାଲାନ୍ସ’ ସହ ଆପଣଙ୍କ ଆକାଉଣ୍ଟ ରହିବ ସୁରକ୍ଷିତ । ଏଥିସହ ସମସ୍ତ ସଞ୍ଚୟ ଖାତା ଉପରେ ସୁଧ ଦର ସମାନ ରୂପେ ବାର୍ଷିକ 3 ପ୍ରତିଶତ ହୋଇଛି ।
ସର୍ବନିମ୍ନ ଜମା ରାଶି ନିୟମକୁ ହଟାଇଛି ଭାରତୀୟ ଷ୍ଟେଟ ବ୍ୟାଙ୍କ । ଅର୍ଥାତ ଏଣିକି ଆକାଉଣ୍ଟରେ କୌଣସି ନିର୍ଦ୍ଧାରିତ ରାଶି ଜମା ନେଇ ଆପଣ ବାଧ୍ୟ ନୁହଁନ୍ତି । ବୁଧବାର ଏ ନେଇ ଘୋଷଣା କରି ଏସବିଆଇ 44.51 କୋଟି ସଞ୍ଚୟ ଖାତାଧାରୀଙ୍କୁ ଆଶ୍ବସ୍ତ କରିଛି ।
ଦେଶରେ ଆର୍ଥିକ ଯୋଗାଦାନକୁ ବୃଦ୍ଧି କରିବା ପାଇଁ ‘ଜିରୋ ବାଲାନ୍ସ’କୁ ଏସବିଆଇ ପ୍ରୋତ୍ସାହନ ଦେଇଛି । ଫଳରେ ହାରାହାରୀ ମାସିକ ନ୍ୟୁନତମ ରାଶି (ଏଏମବି) ରଖିବା କ୍ଷେତ୍ରରେ ଆପଣ ସମ୍ପୁର୍ଣ୍ଣ ମୁକ୍ତ ।
ବର୍ତ୍ତମାନ ମେଟ୍ରୋ ସହରଗୁଡ଼ିକରେ ସଞ୍ଚୟ ଖାତାଧାରୀଙ୍କୁ ହାରାହାରି ମାସିକ ସର୍ବନିମ୍ନ ରାଶି ଭାବରେ 3000 ଟଙ୍କା, ସହରାଞ୍ଚଳରେ 2,000 ଏବଂ ଗ୍ରାମାଞ୍ଚଳରେ 1000 ଟଙ୍କା ରଖିବାକୁ ପଡୁଥିଲା ।
ଆଉ ହାରାହାରି ମାସିକ ସର୍ବନିମ୍ନ ରାଶିକୁ ଜମା ନ ରଖିବା କ୍ଷେତ୍ରରେ, ଆକାଉଣ୍ଟଧାରୀଙ୍କୁ 5ରୁ 15 ଟଙ୍କା ଜୋରିମାନା ଏବଂ ଟିକସ ଦେବାକୁ ପଡୁଛି |
ହେଲେ ଏବେ ଏଏମବି ସମାପ୍ତ ହେବା ଦ୍ବାରା ବ୍ୟାଙ୍କ ଏସବୁ ଖାତାଧାରୀଙ୍କୁ ଜିରୋ ବାଲାନ୍ସ ସୁବିଧା ପ୍ରଦାନ କରିବ । ଏହା ବ୍ୟତିତ ବ୍ୟାଙ୍କ ତ୍ରୈୟମାସିକ ଆଧାରରେ ଏସଏମଏସ ସେବା ପାଇଁ ଆଦାୟ ହେଉଥିବା ଶୁଳ୍କକୁ ମଧ୍ୟ ଛାଡ କରିଛି । ‘‘ ବ୍ୟାଙ୍କର ଏହି ନିଷ୍ପତ୍ତି ଅଧିକ ଲୋକଙ୍କ ମୁହଁରେ ହସ ଫୁଟେଇବ ବୋଲି ଏସବିଆଇ ଅଧ୍ୟକ୍ଷ ରଜନୀଶ କୁମାର କହିଛନ୍ତି ।
