ଭୁବନେଶ୍ବର: ଆକାଶଛୁଆଁ ପେଟ୍ରୋଲ ଦାମ ଏବେ ଦେଶର ଆନ୍ଦୋଳନ ପାଇଁ ଯୋଗାଉଛି ଇନ୍ଧନ । ଦେଶର ବିଭିନ୍ନ ସ୍ଥାନରେ ପେଟ୍ରୋଲ ଦାମ ଶତକ ମାରିବା ପରେ ମାଲକାନାଗିରିରେ ମଧ୍ୟ 100 ଟଙ୍କା ଛୁଇଁଛି ତେଲଦର । ଆଉ ତେଲ ତାତିରେ କଣା ହେଲାଣି ସାଧାରଣ ଖାଉଟି ପକେଟ ।
ମାଲକାନଗିରି ଜିଲ୍ଲାର କାଲିମେଳା ବ୍ଲକରେ ପେଟ୍ରୋଲ ଦାମ ଲିଟର ପ୍ରତି ରେକର୍ଡ ସ୍ତର 100.29 ଟଙ୍କା (ପ୍ରିମିୟମ) ଓ 97.14 ଟଙ୍କା (ସାଧାରଣ ପେଟ୍ରୋଲ) ହେଲାଣି । ଏପରିକି ରାଜ୍ୟର ବିଭିନ୍ନ ଜିଲ୍ଲାରେ ପେଟ୍ରୋଲ ଦାମ 100 ଟଙ୍କା ନିକଟତର ରହିଛି ।
ରାଜ୍ୟର ବିଭିନ୍ନ ସହରରେ ପେଟ୍ରୋଲ ଦାମ
| ବ୍ରହ୍ମପୁର (ଗଞ୍ଜାମ) | 92.89 ଟଙ୍କା |
| ଯୋଡା (କେନ୍ଦୁଝର) | 93.45 ଟଙ୍କା |
| ବଲାଙ୍ଗୀର | 93.19 ଟଙ୍କା |
| ନବରଙ୍ଗପୁର | 95.51ଟଙ୍କା |
| ଫୁଲବାଣୀ (କନ୍ଧମାଳ ) | 93.07 ଟଙ୍କା |
| ପଦ୍ମପୁର (ବରଗଡ ) | 93.14 ଟଙ୍କା |
| ସମ୍ବଲପୁର | 92.21ଟଙ୍କା |
| ରାଉରକେଲା (ସୁନ୍ଦରଗଡ ) | 92.58ଟଙ୍କା |
| ଯାଜପୁର | 91.82ଟଙ୍କା |
| ଝାରସୁଗୁଡା | 91.68 ଟଙ୍କା |
| ବାଲେଶ୍ବର | 91.65 ଟଙ୍କା |
ସେହିପରି ଟ୍ବିନ ସିଟି ଭୁବନେଶ୍ବର ଏବଂ କଟକରେ ପେଟ୍ରୋଲ ଦାମ ଲିଟର ପ୍ରତି କ୍ରମଶଃ 91.66 ଟଙ୍କା ଓ 91.95 ଟଙ୍କା ରହିଛି ।
ତେଲ ଦର ବୃଦ୍ଧିକୁ ନେଇ ଆଜି ବିଧାନସଭା ବଜେଟ ଅଧିବେଶନରେ ବିରୋଧୀ ହଟ୍ଟଗୋଳ କରିଛନ୍ତି । ଆଉ ଏ ନେଇ ଜବାବ ରଖି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କେନ୍ଦ୍ରକୁ ଅଙ୍ଗୁଳି ଦେଖାଇଛନ୍ତି । କେନ୍ଦ୍ର ସରକାର ଭିତ୍ତିଭୂମି ଓ କୃଷି ଭଳି ଦୁଇଟି ଅତିରିକ୍ତ ସେସ ଲାଗୁ କରି 18 ପ୍ରତିଶତ ଟିକସ ପେଟ୍ରୋଲକୁ ଆଦାୟ କରୁଛନ୍ତି । ଯେଉଁଥିପାଇଁ ତୈଳଦର ଅହେତୁକ ଭାବେ ବୃଦ୍ଧି ପାଇଛି । ଏହି ଦୁଇଟି ସେସ ଛାଡ଼ କଲେ ତୈଳଦର କମିବ ବୋଲି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
