ନୂଆଦିଲ୍ଲୀ: ‘‘ ବର୍ତ୍ତମାନ ସମୟ ଆସିଛି ଭିତ୍ତିଭୂମି କ୍ଷେତ୍ରରେ ବିଚ୍ଛିନ୍ନ ଭାବରେ କାର୍ଯ୍ୟ କରିବାର ଯୁଗ ସମାପ୍ତ କରିବା । ଏଥିପାଇଁ ସମଗ୍ର ଦେଶକୁ ମଲ୍ଟି ମଡେଲ କନେକ୍ଟିଭିଟି ଭିତ୍ତିଭୂମି ସହିତ ଯୋଡିବା ପାଇଁ ଏକ ବହୁତ ବଡ ଯୋଜନା ପ୍ରସ୍ତୁତ କରାଯାଇଛି । 74ତମ ସ୍ବାଧୀନତା ଦିବସରେ ଐତିହାସିକ ଲାଲକିଲାରେ ଦେଶବାସୀଙ୍କୁ ସମ୍ବୋଧନ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏ ନେଇ ଆହ୍ବାନ ଦେଇଛନ୍ତି ।
ସେ କହିଛନ୍ତି କି, ଦେଶ ପାଇଁ ଆବଶ୍ୟକୀୟ ନ୍ୟାସନାଲ ଇନଫ୍ରାଷ୍ଟ୍ରକ୍ଚର ପାଇପଲାଇନ ପ୍ରୋଜେକ୍ଟ (ଏନଆଇପି) ପୂରଣ ହେବ । ଗତ 5 ବର୍ଷରେ ଦେଶରେ ଦେଢ ଲକ୍ଷ ଗ୍ରାମ ପଞ୍ଚାୟତକୁ ଅପ୍ଟିକାଲ ଫାଇବର ସହ ଯୋଡାଯାଇଛି । ସେ ଆହୁରି ମଧ୍ୟ କହିଛନ୍ତି କି ଦେଶରେ ନୂଆ ଜାତୀୟ ସାଇବର ସୁରକ୍ଷା ରଣନୀତିର ବ୍ଲୁପ୍ରିଣ୍ଟ ପ୍ରସ୍ତୁତ କରିଦିଆଯାଇଛି । ପ୍ରଧାନମନ୍ତ୍ରୀ ନିଜ ଉଦବୋଧନରେ ମେକ ଇନ ଇଣ୍ଡିଆ ସହ ମେକ ଫର ୱାଲ୍ଡ (ବିଶ୍ବ ପାଇଁ ବିନିର୍ମାଣ) ନାରା ଯୋଡିଛନ୍ତି ।
ଆର୍ଥିକ ପଲିସିରେ ସୁଧାର ଓ ଭିତ୍ତିଭୂମି ଢାଞ୍ଚାର ବିକାଶ ସହ ବିଶ୍ବ ଯୋଗାଣ ଶୃଙ୍ଖଳାରେ ବିନିର୍ମାଣର ଏକ ପ୍ରମୁଖ କେନ୍ଦ୍ର ରୂପେ ପ୍ରସ୍ତୁତ ପାଇଁ ଭାରତ ସଂକଳ୍ପ ନେଇଛି । ଦେଶ 130 କୋଟି ଜନତାଙ୍କ ସାମର୍ଥ୍ୟ ସହ ମେକ ଫର ୱାଲ୍ଡ ଦିଶାରେ ପ୍ରଗତି ପାଇଁ ସକ୍ଷମ ।
ଏଣୁ ଦେଶକୁ ଆଧୁନିକତା ଆଡକୁ ଦ୍ରୁତ ଗତିରେ ଆଗେଇ ନେବା ଏବଂ ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ ପାଇଁ ଭିତ୍ତିଭୂମି କ୍ଷେତ୍ରକୁ ଏକ ନୂତନ ଦିଗ ଦେବାର ଆବଶ୍ୟକତା ରହିଛି ବୋଲି ପିଏମ ଦର୍ଶାଇଛନ୍ତି ।
