ମୁମ୍ବାଇ: କୋରନା କବଳରେ ବିଶ୍ବ ଅର୍ଥନୀତି । କ୍ଷୁଦ୍ର ସଂସ୍ଥା ଠାରୁ ବଡ ବଡ ଉଦ୍ୟୋଗ କ୍ଷତିଗ୍ରସ୍ତ । ଏହି ମାରାତ୍ମକ ପ୍ରାଣଘାତୀ ଭାଇରସ ଯୋଗୁଁ ପୁଞ୍ଜିବଜାରରେ ମାଡି ଆସିଲାଣି ଝଡ । ନିବେଶକ ଠାରୁ ବିଶ୍ବର ପ୍ରମୁଖ ବିଲିୟନାରୀ ସମସ୍ତେ ଆକଙ୍କିତ । ତେବେ ଏହାର ପ୍ରଭାବକୁ ନେଇ ବିଶ୍ବ ସହ ଘରୋଇ ସ୍ଥିତି ଉପରୁ ଆଖି ହଟାଉନି ଭାରତୀୟ ରିଜର୍ଭ ବ୍ୟାଙ୍କ । ଶୀଥିଳ ଆର୍ଥିକ ସ୍ଥିତିକୁ ସୁଧାରିବା ପରିପେକ୍ଷୀରେ ମଙ୍ଗଳବାର ଏ ନେଇ ସୂଚନା ଦେଇ ଆଶ୍ବସ୍ତି କରିଛି ଆରବିଆଇ ।
ଆର୍ଥିକ ବଜାରଗୁଡିକ ଯେପରି ଶୃଙ୍ଖଳିତ ଭାବେ କାର୍ଯ୍ୟ କରିବ , ସେଥିପାଇଁ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ କେନ୍ଦ୍ର ବ୍ୟାଙ୍କ ପ୍ରସ୍ତୁତ ବୋଲି ଦର୍ଶାଇଛି । ଆରବିଆଇ ଏକ ବୟାନରେ କହିଛି ଯେ, କୋରୋନା ଭାଇରସ ସଂକ୍ରମଣ ସହ ବିଶ୍ବ ସ୍ତରର ଆର୍ଥିକ ବଜାରରେ ହ୍ରାସ-ବୃଦ୍ଧି ଦେଖିବାକୁ ମିଳିଛି । କାରଣ ନିବେଶକ ବଜାରରୁ ଟଙ୍କା ଉଠାଇ ସୁରକ୍ଷିତ ସ୍ଥାନରେ ନିବେଶ ପାଇଁ ଇଚ୍ଛା କରୁଛନ୍ତି ।
ବିଶ୍ବ ଓ ଘରୋଇ ଗତିବିଧି ଉପରେ ଅତି ନିକଟରୁ ନଜର ରଖିବା ସହ ବଜାର ବ୍ୟାବସ୍ଥାକୁ ସୁଧାରିବା ଓ ନିବେଶକଙ୍କ ଭରସା ବଜାୟ ରଖିବା ଏବଂ ଆର୍ଥିକ ସ୍ଥିରତା ସୁନିଶ୍ଚିତ କରିବା ନେଇ ଉପଯୁକ୍ତ ପଦକ୍ଷେପ ପାଇଁ ଆରବିଆଇ ପ୍ରୟାସ କରୁଛି ବୋଲି କୁହାଯାଇଛି ।
ଚୀନରେ ଦେଖାଦେଇଥିବା କୋରୋନା ଭାଇରସ ସଙ୍କଟ ଅନ୍ୟ ଦେଶକୁ ମାଡିବାରେ ଲାଗିଛି । ଫଳରେ ଦେଶଗୁଡିକ ପ୍ରତିକାରମୂଳକ ପଦକ୍ଷେପ ଆପଣାଉଛନ୍ତି । ଇରାନରେ ଏହି ଭାଇରସ ଅଧିକ ମାତ୍ରାରେ ବ୍ୟାପୁଥିବାରୁ ବହୁ ରାଷ୍ଟ୍ର ଏଠାକୁ ଯାତ୍ରା ବ୍ୟାନ କରିଛନ୍ତ । ଏପଟେ ଭାରତରେ ମଧ୍ୟ 2 କୋରୋନା ଭାଇରସ ଆକ୍ରନ୍ତ ରୋଗୀ ଚିହ୍ନଟ ହେବା ପରେ ପଦକ୍ଷେପ ଗ୍ରହଣ କରାଯାଉଛି ।
