ନୂଆଦିଲ୍ଲୀ: ଜୁନ 12 ରେ ହେବ ଦ୍ରବ୍ୟ ଓ ସେବା କର (ଜିଏସଟି) ପରିଷଦର 40 ତମ ବୈଠକ । ଏହି ବୈଠକରେ କୋଭିଡ-19ରେ ପ୍ରଭାବିତ ରାଜସ୍ବର ସମୀକ୍ଷା କରାଯିବ ।
ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ଭିଡିଓ କନଫରେନ୍ସି ଜରିଆରେ ଜିଏସଟି ପରିଷଦ ବୈଠକ ବସିବ । ଏଥିରେ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ଅର୍ଥମନ୍ତ୍ରୀ ଓ ପ୍ରତିନିଧି ସାମିଲ ହେବେ ।
କୋରୋନା ସଂକ୍ରମଣ ରୋକିବା ପାଇଁ ମାର୍ଚ୍ଚ 25ରୁ ଦେଶବ୍ୟାପି ଲକଡାଉନ ଜାରି ହୋଇଥିଲା । ଫଳରେ ଆର୍ଥିକ କାର୍ଯ୍ୟକଳାପ ଠପ ରହିବା ସହ କାମଧନ୍ଦା ବନ୍ଦ ରହିଛି । ଯେଉଁଥିପାଇଁ କର ସଂଗ୍ରହ ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି । ତେବେ କେନ୍ଦ୍ର ଓ ରାଜ୍ୟର ରାଜସ୍ବରେ ପଡିଥିବା ପ୍ରଭାବ ଓ ଏହାର କ୍ଷତିପୂରଣ ପାଇଁ ପଦକ୍ଷେପଗୁଡିକ ଉପରେ ଏହି ବୈଠକରେ ବିଚାର କରାଯିବ ।
ଟିକସ ସଂଗ୍ରହରେ ଖରାପ ପ୍ରଦର୍ଶନ ଏବଂ ରିଟର୍ଣ୍ଣ ଦାଖଲ ତାରିଖ ବୃଦ୍ଧି ଯୋଗୁଁ ସରକାର ଏପ୍ରିଲ ଏବଂ ମେ ମାସର ଜିଏସଟି ସଂଗ୍ରହ ତଥ୍ୟ ପ୍ରକାଶ କରିନାହାଁନ୍ତି। ଜିଏସଟି ପରିଷଦର ଶେଷ ବୈଠକ ମାର୍ଚ୍ଚ 14ରେ ଅନୁଷ୍ଠିତ ହୋଇଥିଲା ।
