ନୂଆଦିଲ୍ଲୀ: ଗତ ଆର୍ଥିକ ବର୍ଷ ମୋଟ ଘରୋଇ ଉତ୍ପାଦ(ଜିଡିପି) ହ୍ରାସକୁ ନେଇ ସରକାରଙ୍କ ଉପରେ ବର୍ଷିଛନ୍ତି କଂଗ୍ରେସ ବରିଷ୍ଠ ନେତା ତଥା ପୂର୍ବତନ ଅର୍ଥମନ୍ତ୍ରୀ ପି ଚିଦାମ୍ବରମ । ଏହି ହ୍ରାସ ଭାଜପା ସରକାରର ଆର୍ଥିକ ବ୍ୟବସ୍ଥାର କାହାଣୀକୁ ବୟାନ କରୁଛି ବୋଲି ଚିଦାମ୍ବରମ କହିଛନ୍ତି ।
ଚିଦାମ୍ବରମ ଟ୍ବିଟ କରିଛନ୍ତି କି, ‘‘ଆମର ଆକଳନ ଥିଲା କି ଗତ ଆର୍ଥିକ ବର୍ଷର ଚତୁର୍ଥ ତ୍ରୟମାସରେ ଜିଡିପି 4 ପ୍ରତିଶତ ତଳେ ରହିବ । ହେଲେ ଏହା ଆହୁରି ଖରାପ ସ୍ଥିରେ ରହିବା ସହ 3.1 ପ୍ରତିଶତକୁ ଖସିଛି ।’’
ଏଥିସହ ଆହୁରୀ ମଧ୍ୟ କହିଛନ୍ତି କି, ‘ ମନେ ରଖନ୍ତୁ, ଏହି ସ୍ଥିତି ଲକଡାଉନ ପୂର୍ବର । ଚତୁର୍ଥ ତ୍ରୟମାସର 91 ଦିନ ମଧ୍ୟରୁ କେବଳ 7 ଦିନ ଲକଡାଉନ ରହିଛି ।’
ଶୁକ୍ରବାର ପ୍ରକାଶିତ 2019-20 ଆର୍ଥିକ ବର୍ଷର ଚତୁର୍ଥ ତ୍ରୟମାସ(ଜାନୁଆରୀ-ମାର୍ଚ୍ଚ)ର ଅଭିବୃଦ୍ଧି ହାର ହ୍ରାସ ପାଇ 3.1 ପ୍ରତିଶତରେ ପହଞ୍ଚିଛି । ଏହା ପୂର୍ବ ଆର୍ଥିକ ବର୍ଷ ସମାନ ତ୍ରୟମାସରେ ଅଭିବୃଦ୍ଧି ହାର 5.7 ପ୍ରତିଶତ ରହିଥିଲା ।
ଏଥିସହ ଗତ ଆର୍ଥିକ ବର୍ଷର ବାର୍ଷିକ ବିକାଶ ଦର 4.2 ପ୍ରତିଶତକୁ ହ୍ରାସ ପାଇଛି । ଯାହା ଏହା ପୂର୍ବ ଆର୍ଥିକ ବର୍ଷ 6.1 ପ୍ରତିଶତ ରହିଥିଲା ।
