ନୂଆଦିଲ୍ଲୀ: ବଜେଟ ପୂର୍ବରୁ ଆୟକର ସ୍ଲାବରେ ପରିବର୍ତ୍ତନ ନେଇ ପରାମର୍ଶ ଦେଇଛନ୍ତି ପୂର୍ବତନ ଅର୍ଥସଚିବ ସୁବାଷ ଚନ୍ଦ୍ର ଗର୍ଗ । ସେସ ଓ ସରଚାର୍ଜ ବିନା 4 ସ୍ଲାବ ବିଶିଷ୍ଟ ବ୍ୟକ୍ତିଗତ ଟିକସର ସରଳୀକୃତ ସରଞ୍ଚନା ପାଇଁ ମତ ରଖିଛନ୍ତି ଗର୍ଗ ।
ସେପ୍ଟେମ୍ବରରେ ଅର୍ଥମନ୍ତ୍ରଣାଳୟ ପକ୍ଷରୁ କର୍ପୋରେଟ କର ହ୍ରାସ ପରେ ବ୍ୟକ୍ତିଗତ ଆୟକର ସ୍ଲାବରେ ରିହାତି ପାଇଁ ଦାବି ଉଠୁଛି । ଆଗକୁ ବଜେଟ ରହୁଥିବାରୁ ଏହି ଆୟକର ହ୍ରାସ ନେଇ ଜୋରଦାର ସ୍ବର ତେଜୁଛି । କାରଣ ସେସ ଓ ସରଚାର୍ଜ ଯୋଗୁଁ ବ୍ୟକ୍ତିଗତ ଆୟକର ବଢିବାରେ ଲାଗୁଛି ।
ଗର୍ଗ ନିଜ ବ୍ଲଗରେ ଲେଖିଛନ୍ତି ଯେ, ‘‘ ଚଳିତ ଆର୍ଥିକ ବର୍ଷ ମଧ୍ୟରେ କମ୍ପାନୀ କର ଢାଞ୍ଚାକୁ ତର୍କସଙ୍ଗତ ଓ ପ୍ରତିଯୋଗୀତାପୂର୍ଣ୍ଣ କରିଦିଆଯାଇଛି । ଏ ନେଇ ଆଉ କୌଣସି ପଦକ୍ଷେପ ପାଇଁ ଆଶା ନାହିଁ । ତେବେ ବ୍ୟକ୍ତିଗତ ଆୟକର କରପ୍ରକ୍ରିୟା ଢାଞ୍ଚାରେ କିଛି ପ୍ରମୁଖ ସୁଧାରକୁ ଆଗକୁ ବଢାଇବା ଦରକାର । ’’
ସେ ଆହୁରି ମଧ୍ୟ ଜଣାଇଛନ୍ତି କି, ଆୟକର ମାମଲାରେ ପାଖାପାଖୀ 8ଟି ସ୍ଲାବ ରହିଛି । ଯେଉଁଥିରେ ସବୁଠୁ ଉଚ୍ଚ କର ଦର 40 ପ୍ରତିଶତରୁ ମଧ୍ୟ ଅଧିକ ରହିଛି ।
ଆୟକର ଢାଞ୍ଚା ସୁଧାର ଉପରେ ଜୋର ଦେଇ ଗର୍ଗ କହିଛନ୍ତି କି, ବାର୍ଷିକ 5 ଲକ୍ଷ ଟଙ୍କା ଆୟ ଉପରେ କର ଫ୍ରି ରହିବା ଆବଶ୍ୟକ । ସେହିପରି 5ରୁ 10 ଲକ୍ଷ ଆୟ ଉପରେ 5 ପ୍ରତିଶତ ଓ 10ରୁ 25 ଲକ୍ଷ ଆୟ ଉପରେ 15 ପ୍ରତିଶତ ଏବଂ 25ର 50 ଲକ୍ଷ ଆୟ ଉପରେ 25 ପ୍ରତିଶତ , 50 ଲକ୍ଷରୁ ଊର୍ଦ୍ଧ୍ବ ଆୟ ଉପରେ 35 ପ୍ରତିଶତ କର ରହିବା ଦରକାର । ଏଭଳି ଭାବେ ବ୍ୟକ୍ତିଗତ ଆୟକର ଢାଞ୍ଚା ବହୁତ ସରଳ ଓ ଉଚିତ ଢଙ୍ଗରେ ରହିବ ।
ଆଉ ଏଭଳି କର ଉପରେ କୌଣସି ସେସ ଓ ସରଚାର୍ଜ ମଧ୍ୟ ରହିବା ଠିକ ନୁହେଁ । ଫଳରେ କରଦାତା ଏହାକୁ ସ୍ବାଗତ କରିବା ସହ ଠକେଇ କମିବ ।
