ନୂଆଦିଲ୍ଲୀ: ଚୀନ ସାମଗ୍ରୀ ବର୍ଜନ ପାଇଁ ଦେଶବ୍ୟାପୀ ଅଭିଯାନ ଆରମ୍ଭ କରିଛି ବ୍ୟବସାୟୀ ସଂଗଠନ କନଫେଡେରେସନ ଅଫ ଅଲ ଇଣ୍ଡିଆ ଟ୍ରେଡର୍ସ(CAIT) । ‘ଭାରତୀୟ ସାମାନ, ଆମର ଅଭିମାନ’ ଏହି ଅଭିଯାନର ମୂଳମନ୍ତ୍ର ।
ସିଏଆଇଟି କହିଛି କି, ଏହି ଅଭିଯାନ ମାଧ୍ୟମରେ 2021 ଡିସେମ୍ବର ସୁଦ୍ଧା ଚୀନ ବସ୍ତୁର ଭାରତ ଦ୍ଵାରା ହେଉଥିବା ଆମଦାନୀରେ ପ୍ରାୟ 1 ଲକ୍ଷ କୋଟି ଟଙ୍କା ହ୍ରାସ କରିବାକୁ ଲକ୍ଷ୍ୟ ରଖାଯାଇଛି ।
ଏଥିସହ ଏହି ଅଭିଯାନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ଲୋକାଲ ଫର ଭୋକାଲ’ ଓ ଆତ୍ମନିର୍ଭର ଭାରତ ଆହ୍ବାନକୁ ସଫଳ କରିବା ଦିଶାରେ ଏକ ମହତ୍ବପୂର୍ଣ୍ଣ ପଦକ୍ଷେପ ବୋଲି ସିଏଆଇଟି କହିଛି । ସିଏଆଇଟି ମହାସଚିବ ପ୍ରବୀଣ ଖଣ୍ଡେଲୱାଲ ଦିଲ୍ଲୀର ଏକ ଭିଡିଓ କନଫରେନ୍ସିରେ କହିଛନ୍ତି କି, ଏହି ଅଭିଯାନର ପ୍ରଥମ ଚରଣରେ ସଂଗଠନ ଚୀନରୁ ଆମଦାନୀ ହେଉଥିବା ପ୍ରାୟ 3 ହଜାର ବସ୍ତୁର ଏକ ତାଲିକା ପ୍ରସ୍ତୁତ କରିଛି । ଯାହାର ଉତ୍ପାଦନ ପୂର୍ବରୁ ଭାରତରେ ନିର୍ମାଣ ହେଉଛି । ସଂଗଠନ ଏହି ଅଭିଯାନ ମାଧ୍ୟମରେ ବ୍ୟବସାୟୀଙ୍କୁ ଚୀନ ବସ୍ତୁ ବିକ୍ରି ନ କରିବାକୁ ଆବେଦନ କରିବା ସହ ଦେଶର ଜନତାଙ୍କୁ ସ୍ଵଦେଶ ଉତ୍ପାଦ ବ୍ୟବହାର ପାଇଁ ସଚେତନ କରାଇବ । ଚୀନରୁ ଭାରତ ବାର୍ଷିକ ଆମଦାନୀ ପ୍ରାୟ 70 ଅରବ ଡଲାର ହୋଇଥାଏ ।
