ନୂଆଦିଲ୍ଲୀ: ବଜେଟ୍ 2021ରେ କୃଷି କ୍ଷେତ୍ରକୁ ମଧ୍ୟ ପ୍ରାଧାନ୍ୟ ଦେଇଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ଏମଏସପିକୁ ଗୁରୁତ୍ବ ଦେବା ସହ ଖର୍ଚ୍ଚର ଦେଢଗୁଣା ଏମଏସପି କରାଯିବ ବୋଲି ଅର୍ଥମନ୍ତ୍ରୀ କହିଛନ୍ତି । ଏମଏସପି ପାଇଁ 75 ହଜାର କୋଟି ଟଙ୍କା ଆବଣ୍ଟନ କରାଯାଇଛି ।
ସେହିପରି ଚାଷୀଙ୍କ ଆୟ 2022 ସୁଦ୍ଧା ଦୁଇଗୁଣ ହେବ ବୋଲି ଅର୍ଥମନ୍ତ୍ରୀ କହିଛନ୍ତି । ଧାନକିଣାରେ 2021ରେ 1.74 କୋଟି ଖର୍ଚ୍ଚ ହେବ । ଏଥିରୁ ଲାଭ ପାଇବେ 1.54 କୋଟି ଚାଷୀ । ସେପଟେ ଚଳିତ ବର୍ଷ ଚାଷୀଙ୍କ ଠାରୁ 75100 କୋଟି ର ଗହମ କିଣାଯାଇଛି । 22 ଟି ଫସଲ ରପ୍ତାନୀ କରିବେ କୃଷକ ବୋଲି ଅର୍ଥମନ୍ତ୍ରୀ କହିଛନ୍ତି ।
ଦେଶରେ 5 ନୂଆ ବଡ କୃଷି ହବ୍ ହେବ । 1 ହଜାରରୁ ଅଧିକ ମଣ୍ଡିକୁ ଅନଲାଇନରେ ଯୋଡାଯିବ ବୋଲି ଅର୍ଥମନ୍ତ୍ରୀ ସଂସଦରେ କହିଛନ୍ତି । କୃଷି ଋଣକୁ ବଢାଇ 16.5 ଲକ୍ଷ ଟଙ୍କା ରଖାଯାଇଛି । ମାଇକ୍ରୋ ଇରିଗେସନ୍ ପାଇଁ 5000 କୋଟିର ଅତିରିକ୍ତ ବଜେଟ ରହିଛି।
‘ଏକ ରାଷ୍ଟ୍ର ଏକ ରାସନ’ ଅନ୍ତର୍ଗତ ବାକି ଥିବା 4ଟି ରାଜ୍ୟକୁ ଯୋଡାଯିବ । ପଶୁପାଳନ ଡାଏରୀ ପାଇଁ 40 ହଜାର କୋଟି । ଜଳସେଚନ ପାଇଁ 5 ହଜାର କୋଟି ଓ ଡାଲି ଚାଷୀଙ୍କ ପାଇଁ 10 ହଜାର କୋଟି ବ୍ୟୟବରାଦ ହୋଇଥିବା ଅର୍ଥମନ୍ତ୍ରୀ କହିଛନ୍ତି ।
କୃଷି କ୍ଷେତ୍ରରେ ବଜେଟ୍ର ମୁଖ୍ୟାଂଶ :
- କୃଷକଙ୍କୁ 75 ହଜାର କୋଟି ଟଙ୍କା ଦିଆଯାଇଛି
- ଖର୍ଚ୍ଚର ଦେଢଗୁଣା ଏମଏସପି କରାଯିବ
- କୃଷକଙ୍କ ଠାରୁ ସରକାର କିଣିବା ଉପରେ ପ୍ରାଧାନ୍ୟ
- ଡାଲି, ଗହମ, ଧାନ ଆଦି ଫସଲର ବଢିଲା ଏମଏସପି
- ଏମଏସପିରେ କିଣା ଜାରି ରହିବ
- ଏକ ଦେଶ ଏକ ରାସନ କାର୍ଡ ହେବ
- ମଣ୍ଡିଗୁଡିକୁ ଇଣ୍ଟରନେଟ ସହିତ ଯୋଡାଯିବ
- କୃଷି ଋଣକୁ ବଢାଇ 16.5 ଲକ୍ଷ ଟଙ୍କା ରଖାଯାଇଛି
- ଅପରେସନ ଗ୍ରୀନ ସ୍କିମର ଘୋଷଣା
- ପାଞ୍ଚଟି ମତ୍ସ୍ୟଜୀବୀ ବନ୍ଦରକୁ ଅର୍ଥନୈତିକ କାର୍ଯ୍ୟକଳାପର ହବ୍ ଭାବରେ ବିକଶିତ କରାଯିବ
- ତାମିଲନାଡୁରେ ମତ୍ସ୍ୟ ଅବତରଣ କେନ୍ଦ୍ର ବିକଶିତ ହେବ
- ପ୍ରବାସୀ ଶ୍ରମିକଙ୍କ ତଥ୍ୟ ସହିତ ସଂଯୁକ୍ତ ଏକ ପୋର୍ଟାଲ ଲଞ୍ଚ ହେବ
