ନୂଆଦିଲ୍ଲୀ: ଉଜ୍ଜ୍ଵଳା ଯୋଜନା ହିତାଧିକାରୀଙ୍କୁ ମିଳିପାରେ ମାଗଣା ସିଲିଣ୍ଡର । ଆର୍ଥିକ ବର୍ଷ 2021-22 ରେ ତିନିମାସ ପାଇଁ ଉଜ୍ୱଲା ସ୍କିମ ହିତାଧିକାରୀଙ୍କୁ ମାଗଣା ଏଲପିଜି ସିଲିଣ୍ଡର ଯୋଗାଣ ପାଇଁ ସରକାର ଏକ ପ୍ରସ୍ତାବ ଆଣିପାରନ୍ତି । ଯାହା ଫଳରେ 83 ମିଲିୟନ ବିପିଏଲ ପରିବାର ଉପକୃତ ହୋଇପାରିବେ ।
ସିଲିଣ୍ଡର ଦର ବୃଦ୍ଧି ଖାଉଟିଙ୍କ ଚିନ୍ତା ବଢାଇ ବିପିଏଲ ଶ୍ରେଣୀ ପାଇଁ ଏହା ବୋଝ ଉପରେ ନଳିତା ବିଡା ସାଜିଛି । ଏଭଳି ସ୍ଥିତିରେ ପ୍ରଧାନମନ୍ତ୍ରୀ ଉଜ୍ଜଳା ଯୋଜନା ଅଧୀନରେ ମାଗଣା ଏଲପିଜି ସିଲିଣ୍ଡର ଯୋଗାଇବା ସମୟ ସୀମାକୁ ଆହୁରି 3 ମାସ ପର୍ଯ୍ୟନ୍ତ ବୃଦ୍ଧି କରିବା ନେଇ ଚିନ୍ତା କରିଛନ୍ତି ।
ବୈଶ୍ବିକ ସ୍ତରରେ ଦାମ ବୃଦ୍ଧି ଯୋଗୁଁ ଏହାର ପ୍ରଭାବରେ ଘରୋଇ ବଜାରରେ 14.2 କିଲୋ ରନ୍ଧନ ଗ୍ୟାସ ଦାମ ଜାନୁଆରୀରୁ 125 ଟଙ୍କା ବୃଦ୍ଧି ହେଲାଣି । ଫଳରେ ଏଲପିଜି ସିଲିଣ୍ଡର ଦାମ 694 ଟଙ୍କାରୁ ଏବେ 819 ଟଙ୍କାରେ ପହଞ୍ଚିଲାଣି । ବାସ୍ତବରେ ଗତ ବର୍ଷ ମେ ମାସରୁ ଦିଲ୍ଲୀରେ ରନ୍ଧନ ଗ୍ୟାସର ମୂଲ୍ୟ 237.50 ଟଙ୍କା ବୃଦ୍ଧି ପାଇଛି ।
ତଥ୍ୟ ଅନୁସାରେ କୋଭିଡ ମହାମାରୀ ବର୍ତ୍ତମାନ ସୁଦ୍ଧା ଦେଶକୁ ପ୍ରଭାବିତ କରୁଛି ଏବଂ ବିଭିନ୍ନ ସ୍ତରରେ ବ୍ୟାଘାତ ସୃଷ୍ଟି କରୁଛି । ଏଣୁ ଏହାର ମୁକାବିଲା ସହ ଅର୍ଥନୀତିରୁ ଭିଟାମିନ ଦେବା ପାଇଁ ଆସନ୍ତା ଆର୍ଥିକ ବର୍ଷ ମଧ୍ୟ ସରକାର ଅଧିକ ଉତ୍ସାହଜନକ ପଦକ୍ଷେପ ନେଇପାରନ୍ତି । ଯଦି ଉଜ୍ଜ୍ବଳା ଗ୍ରାହକଙ୍କୁ ତିନୋଟି ମାଗଣା ଏଲପିଜି ସିଲିଣ୍ଡର ଯୋଗାଣ ଘୋଷଣା ହୁଏ ତେବେ ଏହା ଏକ ବଡ ରିଲିଫ ଦେବ ।
ଗତ ବର୍ଷ ଘୋଷଣା ହୋଇଥିବା ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ଅଧିନରେ ବିପିଏଲ୍ ପରିବାରକୁ 3 ମାସ ଯାଏଁ ଗ୍ୟାସ ସିଲିଣ୍ଡର ମାଗଣା ରେ ଦେବାକୁ ଘୋଷଣା ହୋଇଥିଲା । ଏଥିରେ ଏଲପିଜି ସିଲିଣ୍ଡରର ଖୁଚୁରା ବିକ୍ରୟ ମୂଲ୍ୟ ସହିତ ସମାନ ନଗଦ ଅର୍ଥ ସିଧାସଳଖ ହିତାଧିକାରୀଙ୍କ ଆକାଉଣ୍ଟକୁ ସ୍ଥାନାନ୍ତରିତ ହୋଇଥିଲା ।
2021-22 ବଜେଟରେ ମଧ୍ୟ ଦୁଇ ବର୍ଷ ମଧ୍ୟରେ ଉଜ୍ଜଳା ଯୋଜନା ଅଧୀନରେ 10 ନିୟୁତ ହିତାଧିକାରୀ ଯୋଗ ଦେବାକୁ ଘୋଷଣା କରାଯାଇଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି 2016 ମେ 1 ରେ ଉତ୍ତରପ୍ରଦେଶରେ ଉଜ୍ଜଳା ସ୍କିମର ଶୁଭାରମ୍ଭ କରିଥିଲେ । ଉଜ୍ଜଳା ଯୋଜନାରେ ଦେଶରେ ପ୍ରାୟ 8 ଲକ୍ଷ ବିପିଏଲ୍ ପରିବାର ପଞ୍ଜିକୃତ ଅଛନ୍ତି ।
