ନୂଆଦିଲ୍ଲୀ: ଦେଶରେ ବିବାହିତ ମହିଳାଙ୍କ ପ୍ରତି ଅନ୍ୟାୟ ଓ ଅତ୍ୟାଚାର ବୃଦ୍ଧି ପାଉଛି । ଅଧିକାଂଶ ସମୟରେ ଯୌତୁକ ପାଇଁ ଘରୋଇ ହିଂସାର ଶିକାର ହେଉଛନ୍ତି ମହିଳା । ଏଭଳି ସ୍ଥିତିରେ ବିବାହିତ ମହିଳାଙ୍କ ସୁରକ୍ଷାକୁ ଦୃଷ୍ଟିରେ ରଖି ମଙ୍ଗଳବାର ଗୁରୁତ୍ବପୂର୍ଣ୍ଣ ରାୟ ଶୁଣାଇଛନ୍ତି ସର୍ବୋଚ୍ଚ କୋର୍ଟ ।
ଏଣିକି ଘରୋଇ ହିଂସାର ଶିକାର ହେଉଥିବା ମହିଳା ନିଜ ଶାଶୁ ଏବଂ ସ୍ବାମୀଙ୍କ ବିରୁଦ୍ଧରେ ଯେ କୌଣସି ସ୍ଥାନରେ ଥାଇ ମଧ୍ୟ ମାମଲା ରୁଜୁ କରିପାରିବେ । ଯେଉଁ ମହିଳାଙ୍କ ଉପରେ ନିର୍ଯାତନା ସହ ଶାଶୁଘର ଛାଡିବାକୁ ବାଧ୍ୟ କରାଯାଉଥିବ ସେମାନଙ୍କ ଉପରେ ଆଇପିସି ଧାରା 498(A) ଅନୁଯାୟୀ ଅପରାଧିକ ମାମଲା ରୁଜୁ କରିବାକୁ ଅନୁମତି ଦେଇଛନ୍ତି କୋର୍ଟ ।
ଅଧିକ ପଢନ୍ତୁ: ଇଭିଏମକୁ ମୂଷା ଡର!
ମୁଖ୍ୟ ବିଚାରପତି ରଞ୍ଜନ ଗୋଗଇଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଆଜି ଏହି ସମ୍ବେଦନଶୀଳ ମାମଲାର ଶୁଣାଣି କରି ଏହି ଗୁରୁତ୍ବପୁର୍ଣ ରାୟ ଦେଇଛନ୍ତି । ଧାରା 498(A) ଅନୁଯାୟୀ ପୂର୍ବରୁ କେବଳ ଅପରାଧିକ କାର୍ଯ୍ୟାନୁଷ୍ଠାନ/ମାମଲା ଦାୟର କରିବାକୁ ହେଲେ ଅପରାଧ କିମ୍ବା ନିର୍ଯାତନା ଘଟିଥିବା ସ୍ଥାନରୁ ହିଁ ମାମଲା ଦାୟର କରିବାକୁ ପଡୁଥିଲା ।
କିନ୍ତୁ ଆଜି ସର୍ବୋଚ୍ଚ ଅଦାଳତଙ୍କ ଏହି ରାୟ ପରେ ଦୀର୍ଘଦିନ ଧରି ଚାଲିଥିବା ଧାରା 498(A)କୁ ନେଇ ସମସ୍ୟାର ସମାଧାନ ହୋଇଛି । ଫଳରେ ଏବେ ମହିଳାମାନେ ଦେଶର ଯେକୌଣସି ସ୍ଥାନରେ ଥାଇବି ପୋଲିସ ନିକଟରେ ଅଭିଯୋଗ କରିପାରିବେ ।
