ଭୁବନେଶ୍ବର: ବାଡ ଯେବେ ଫସଲ ଖାଏ, ତେବେ ବିଶ୍ବାସ କରିବା କାହାକୁ । ସାଧାରଣ ଜନତା ବହୁ ଆଶାରେ ନିଜ କଷ୍ଟ ଉପାର୍ଜିତ ଧନ ସୁରକ୍ଷିତ ରଖିବା ପାଇଁ ବ୍ୟାଙ୍କରେ ଜମା ରଖିଥାଏ । ଆଉ ସେ ଦୃଢ ନିଶ୍ଚିତ ଥାଏ ତାର କଷ୍ଟ ଉପାର୍ଜିତ ଧନ ସୁରକ୍ଷିତ ରହିଛି। ହେଲେ ତାକୁ ଜଣା ନଥାଏ ବିନା କାରଣରେ ତାକୁ ତଣ୍ଡ ଗଣିବାକୁ ପଡିବ ବ୍ୟାଙ୍କରେ ।
ଆଉ ସେହି ଟଙ୍କାକୁ ଖୋଦ ଅସାଧୁ ବ୍ୟାଙ୍କ କର୍ମଚାରୀ ଲୁଟ କରି ନିଜ ପକେଟ ଗରମ କରିବେ। ଏମିତି ଏକ ଯୋଜନା ବଦ୍ଧ ଷଡଯନ୍ତ୍ର କରି କୋଟି କୋଟି ଟଙ୍କା ହଡପ କରିବାରେ ସକ୍ଷମ ହୋଇଛନ୍ତି ଦୁଇଜଣ ବ୍ୟାଙ୍କ କର୍ମଚାରୀ। ଘଟଣାଟି ହେଉଛି ୨୦୧୫ ଏବଂ ୨୦୧୬ର । ଅନୁଗୋଳ ୟୁନାଇଟେଡ ସେଣ୍ଟ୍ରାଲ କୋପରେଟିଭ ବ୍ଯାଙ୍କରେ କାର୍ଯ୍ୟକରୁଥିଲେ ଢେଙ୍କାନାଳର ସହଦେବ ସାହୁ ଏବଂ ସାନ୍ତୁନୁ କୁମାର ବରାଳ ।
ଉଭୟ ଯୋଜନାବଦ୍ଧ ଭାବେ ବ୍ଯାଙ୍କର ଅଜାଣତରେ ବ୍ଯାଙ୍କିଂ ଆଇଡିରେ ବିଭିନ୍ନ ଗ୍ରାହକଙ୍କୁ ସୁଧ ଚାର୍ଜ ଲଗାଉଥିଲେ । ଆଉ ସେହି ଟଙ୍କାକୁ ଦୁହେଁ ଚତୁରତା ସହ ବ୍ୟାଙ୍କରୁ ହଡପ କରୁଥିଲେ। ଏମିତିକି ପ୍ରାୟ ୬୫ଟି ସଞ୍ଚୟ ଜମା ଖାତା, ସିସି, କରେଣ୍ଟ ଆକାଉଣ୍ଟ ଜରିଆରେ ୧୮୭ଟି ଟ୍ରାଞ୍ଜେକ୍ସନ ଜରିଆରେ ୧,୧୫ ,୧୬,୩୦୦ ଟଙ୍କା ହଡପ କରିଥିଲେ ଏହି ଅଭିଯୁକ୍ତଦ୍ବୟ । ତେବେ ଏହି ଘଟଣାଟି କାମାକ୍ଷାନଗର କୋପରେଟିଭ ସେକ୍ରେଟାରି ଜାଣିବାପରେ କ୍ରାଇବ୍ରାଞ୍ଚ ନିକଟରେ ଅଭିଯୋଗ କରିଥିଲେ ।
କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା ଏହି ଘଟଣାର ତଦନ୍ତ କରି ଏହି ଦୁଇ ଅଭିଯୁକ୍ତଙ୍କୁ ଗିରଫ କରିଛି। କ୍ରାଇମ ବ୍ରାଞ୍ଚ EOW ଏହି ଦୁଇ ଅଭିଯୁକ୍ତଙ୍କୁ ଗିରଫ କରି ତାଙ୍କ ବିରୋଧରେ ଆପିସିର ଧାରା୪୦୯,୪୬୭,୪୬୮,୪୭୧,୪୭୭,୧୨୦ ବିରେ ଉଭୟଙ୍କୁ କାମାକ୍ଷାନଗର ଏସଡିଜେଏମ କୋର୍ଟ ଚାଲାଣ କରିଛି କ୍ରାଇମବ୍ରାଞ୍ଚ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
