ନୂଆଦିଲ୍ଲୀ: ଆଜି(ଗୁରୁବାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦି 2ୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିବେ । ଏହି ସମାରୋହରେ ପ୍ରାୟ 6000 ଅତିଥି ଯୋଗ ଦେବେ ।
ତେବେ ଏହି କାର୍ଯ୍ୟକ୍ରମରେ ନେତା, ଅଭିନେତା, ବିଦେଶୀ ଅତିଥିଙ୍କ ସହ ଖେଳଜଗତର କିଛି କ୍ରୀଡାବିତ୍ମାନେ ଯୋଗଦେବେ ।
ତେବେ କ୍ରିକେଟ୍ ଜଗତର ପୂର୍ବ ଭାରତୀୟ କ୍ରିକେଟର ରାହୁଲ ଦ୍ରାବିଡ, ଅନିଲ୍ କୁମ୍ବଲେ, ଜଭଗଲ ଶ୍ରୀନାଥ ପ୍ରଧାନମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବରେ ଯୋଗେ ଦେବେ । ଏମାନଙ୍କ ବ୍ୟତୀତ ଅନ୍ୟ କିଛି କ୍ରିକେଟରଙ୍କୁ ଶପଥ ପାଠରେ ଯୋଗ ଦେବା ପାଇଁ ନିମନ୍ତ୍ରଣ କରାଯାଇଥିଲା । କିନ୍ତୁ କ୍ରିକେଟ୍ ବିଶ୍ବକପ୍ରେ ସେମାନେ ବ୍ୟସ୍ତ ରହିଥିବାରୁ ଶପଥ ଗ୍ରହଣ ସମାରୋହରେ ଯୋଗ ଦେଇ ପାରିବେ ନାହିଁ ।
ସେହିପରି ଭାରତୀୟ ବ୍ୟାଡମିଣ୍ଟନ ଟିମ୍ର ମୁଖ୍ୟ କୋଚ୍ ପୁଲେଲା ଗୋପିଚନ୍ଦ ଓ ଷ୍ଟାର ମହିଳା ବ୍ୟାଡମିଣ୍ଟନ ଖେଳାଳୀ ସାଇନା ନେହଓ୍ବାଲଙ୍କୁ ମଧ୍ୟ ପ୍ରଧାନମନ୍ତ୍ରୀଙ୍କ ଶପଥ ଗ୍ରହଣ ସମାରୋହରେ ଯୋଗ ଦେବା ପାଇଁ ନିମନ୍ତ୍ରଣ କରାଯାଇଛି ।
ଏଥିସହ ଯୁବ ଜିମନାଷ୍ଟ ଦୀପା କର୍ମାକର, ଦୌଡରାଣୀ ପିଟି ଉଷା ମଧ୍ୟ ଭବ୍ୟ ସମାରୋହରେ ସାମିଲ ହେବେ ।
