ମଧ୍ୟପ୍ରଦେଶ: ସାରା ଦେଶରେ ଜାରୀ ରହିଛି ସାଧାରଣ ନିର୍ବାଚନ । ମୋଟ ସାତଟି ପର୍ଯ୍ୟାୟରୁ ବର୍ତ୍ତମାନ ସୁଦ୍ଧା ପାଞ୍ଚଟି ପର୍ଯ୍ୟାୟ ଶେଷ ହୋଇଥିବା ବେଳେ ଆସନ୍ତାକାଲି ଷଷ୍ଠ ପର୍ଯ୍ୟାୟ ମତଦାନ ହେବ । ପ୍ରଚାର ମୈଦାନରେ ସବୁଦଳର ହେଭିୱେଟ ଥିବାବେଳେ ଆରୋପ ପ୍ରତ୍ୟାରୋପ ମଧ୍ୟ ତୀବ୍ର ହେବାରେ ଲାଗିଛି । 2ଦିନ ତଳେ କଂଗ୍ରେସ ନେତା ଶ୍ୟାମ ପିଟ୍ରୋଡା ଶୀଖ୍ ଦଙ୍ଗାକୁ ନେଇ ବିବାଦୀୟ ମନ୍ତବ୍ୟ ଦେବାପରେ ଆଜି ମଧ୍ୟପ୍ରଦେଶର ପୂର୍ବତ୍ତନ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଏହାର କଡା ଜବାବ ଦେଇଛନ୍ତି ।
ଶିବରାଜ କହିଛନ୍ତି ଜଣେ ଦେଶଭକ୍ତ ଯିଏ ଦେଶ ପାଇଁ ନିଜର ସବୁକିଛି ତ୍ୟାଗ କରିଛନ୍ତି, ଅନ୍ୟପଟେ ଦେଶ ସୁରକ୍ଷା ପାଇଁ ଭାରତୀୟ ସେନାରେ ଶିଖ୍ ଜବାନ ସବୁଠୁ ଆଗରେ ଅଛନ୍ତି । ସେହି ଦେଶଭକ୍ତଙ୍କ ପାଇଁ କଂଗ୍ରେସ ନେତାଙ୍କ ଏପ୍ରକାର ବୟାନକୁ ଦେଶବାସୀ କେବେ କ୍ଷମା କରିବେ ନାହିଁ । କଂଗ୍ରେସ ଦଳରେ ଅନେକ ସର୍ବନାସୀ ନେତା ଅଛନ୍ତି ଯାହାଙ୍କର ବୟାନ ହିଁ କଂଗ୍ରେସକୁ ହରାଇବାରେ କାଫି ଆମକୁ କିଛି କରିବାକୁ ପଡିବ ନାହିଁ ବୋଲି ଶିବରାଜ କହିଛନ୍ତି ।
ଶିବରାଜ ଆହୁରି କହିଛନ୍ତି ଯେ ମଧ୍ୟପ୍ରଦେଶକୁ କଂଗ୍ରେସ ସତ୍ୟାନାଶ କରି ସାରିଛି । ଏବେ ମଧ୍ୟପ୍ରଦେଶର ଜନତା ମାମାଙ୍କୁ(ଶିବରାଜ) ମିସ କରୁଛନ୍ତି । ତେଣୁ ପ୍ରଦେଶ ଜନତା ଏବେ ଚିନ୍ତା କରୁଛନ୍ତି କେମିତି ଏହି ସରକାର ବିଦାୟ ନେବ ସେଥିପାଇଁ ଲୋକସଭା ନିର୍ବାଚନରେ କଂଗ୍ରେସକୁ ସବକ ଶିଖାଇବେ ମଧ୍ୟପ୍ରଦେଶ ଜନତା ।
