ଖୋର୍ଦ୍ଧା: ଜିଲ୍ଲାରେ ଚାଲିଛି ବେଆଇନ ଖଣିଖନନ । ଖୁଲମ ଖୁଲା ଲୁଟ ହେଉଛି ମୂଲ୍ୟବାନ ପଥର । ସବୁ ଜାଣି ଅଜଣା ପ୍ରଶାସନ । ଫଳରେ ମୂଲ୍ୟବାନ ପଥର ଚୋରାଚାଲାଣ ହେବା ସହ ପରିବେଶ ହେଉଛି ପ୍ରଦୂଷିତ ।
ଦିନେ କି ଦୁଇଦିନ ନୁହେଁ, ବର୍ଷ ବର୍ଷ ଧରି ଖୋର୍ଦ୍ଧାରେ ଚାଲିଛି ପଥର ମାଫିଆଙ୍କ ରାଜ । ଖୋର୍ଦ୍ଧା ଉପକଣ୍ଠ ତାପଙ୍ଗ, ମଳିପଡା ଓ କାଇପଦରରେ ଥିବା ପାହଡରୁ ବେଧଡକ ଲୁଟ ହେଉଛି ମୁଗୁନି ପଥର । ହାତଗଣତି କେତୋଟି ଲାଇସେନ୍ସ ପ୍ରାପ୍ତ କ୍ରସରକୁ ଛାଡିଦେଲେ ମାଳମାଳ ବେଆଇନ କ୍ରସର ଚାଲିଛି । ଏପଟେ କ୍ରସର ଧୂଳିରେ ଅଣନିଃଶ୍ବାସୀ ସାଧାରଣ ଲୋକେ।
ଅଭିଯୋଗ ହେଉଛି, ପଥର ମାଫିଆ ଏବଂ କ୍ରସର ମାଲିକଙ୍କ ସହ ସରକାରୀ ବାବୁମାନଙ୍କ ମଧୁଚନ୍ଦ୍ରିକା ଚାଲିଛି । ଲୋକ ଦେଖାଣିଆ କାର୍ଯ୍ୟାନୁଷ୍ଠାନ, ମାତ୍ର ସ୍ଥିତି ଯଥା ପୂର୍ବଂ ତଥା ପରଂ । ମୋଟା ଅଙ୍କର ହାତଗୁଞ୍ଜା ନେଇ ଚୁପ ବସୁଛନ୍ତି ସରକାରୀ ବାବୁ । ଅନ୍ୟପଟେ ପାହାଡ ଲୁଟ ନେଇ ବହୁ ଅଭିଯୋଗ ଆସୁଥିବା ସ୍ବୀକାର କରିଛନ୍ତି ଖୋର୍ଦ୍ଧା ଜିଲ୍ଲାପାଳ ।
ପଥର ଲୁଟି ମାଲାମାଲ ମାଫିଆ । କାର୍ଯ୍ୟାନୁଷ୍ଠାନ ନେବାରେ ବିଫଳ ପ୍ରଶାସନ । ଆଉ ଏଭଳି ସ୍ଥିତିରେ ଅଣନିଃଶ୍ବାସୀ ଜନତା । ଲୁଟ ହେଉଛି କୋଟି କୋଟି ଟଙ୍କାର ରାଜସ୍ବ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
