ଯାଜପୁର: ଜିଲ୍ଲାର କୋରେଇ ଥାନାର ପଦି, ଧନେଶ୍ବର ଛକରେ ଥିବା ହ୍ବିଲ ଢାବା ଏବଂ ଯାଜପୁର ରୋଡ ଥାନା ମୁଣ୍ଡମାଳ ଛକ ସମେତ ବ୍ୟାସନଗର ଅଞ୍ଚଳର ବିଭିନ୍ନ ସ୍ଥାନରେ ଅବକାରୀ ବିଭାଗ ଚଡାଉ କରିଛି । ଏହି ଚଢାଉ ବେଳେ 123 ଲିଟର ବିଦେଶୀ ମଦ ବୋତଲ ସହ 5 ଲିଟର ଦେଶୀ ମହୁଲି ମଦ ଜବତ ହୋଇଛି ।
ତେବେ ଘଟଣାରେ ଜଣେ ମହିଳା ସମେତ 2 ଜଣ ପୁରୁଷଙ୍କୁ ଗିରଫ କରାଯାଇଛି । ମହିଳା ଜଣକ ମୁଣ୍ଡମାଲର କନକ ପାତ୍ର ଓ ଅନ୍ୟ 2 ଜଣ ପଦି ଗ୍ରାମର ଲକ୍ଷ୍ମୀଧର ମୁଦୁଲି ଏବଂ ଧନେଶ୍ବର ଅଞ୍ଚଳର ଅରୁଣ ମହାନ୍ତି ।
ସେପଟେ ବାଲେଶ୍ବର ଜିଲ୍ଲାର ରୁପସା ଥାନା ରାଉତପଡା ପଞ୍ଚାୟତର ବାରତାଳ ଛକରେ ସଦର ଅବକାରୀ ଓ ରୁପସା ପୋଲିସ ପକ୍ଷରୁ ମିଳିତ ଚଢ଼ାଉ କରାଯାଇଥିଲା । ଚଢାଉ ବେଳେ 419 ଲିଟର ଚୋରା ଦେଶୀ ମଦ ସହ ବେପାରୀ ହୀରାବତୀ ଜେନାଙ୍କୁ ଗିରଫ କରାଯାଇଛି । ତେବେ ଘଟଣାର ଅନ୍ୟ ଜଣେ ବେପାରୀ ଅନନ୍ତ ଜେନା ପୋଲିସ ଓ ଅବକାରୀ ବିଭାଗକୁ ଚଖମା ଦେଇ ଘଟଣାସ୍ଥଳରୁ ଫେରାର ହୋଇଯାଇଛି । ଏହି ଚଢ଼ାଉରେ ଅବକାରୀ ଓ ପୋଲିସର 40 ଜଣିଆ ଟିମ ସାମିଲ ଥିବା ଜଣାପଡିଛି ।
ସେହିପରି ଗଞ୍ଜେଇ ଚୋରା ଚାଲାଣ ଖବର ପାଇ ବାଲେଶ୍ବର ସଦର ଅବକାରୀ ବିଭାଗ ଇଶାଣୀ ଠାରେ ଚଢାଉ କରିଥିଲା । ଚଢାଉ ବେଳେ 6 କେଜି ଗଞ୍ଜେଇ ଜବତ ହୋଇଛି । ଯାହାର ମୂଲ୍ୟ 30 ହଜାର ଟଙ୍କା । ଘଟଣାରେ ସମ୍ପୃକ୍ତ ଥିବା ବେପାରୀ ରମେଶ ଚନ୍ଦ୍ର ବେହେରାକୁ ପୋଲିସ ଗିରଫ କରିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା ଓ ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
