ଢେଙ୍କାନାଳ: କୋରୋନା କଟକଣା ଟାଣି ଦେଇଛି ଲକ୍ଷ୍ମଣରେଖା । କେହି କାହାକୁ ଭେଟିବା କଷ୍ଟକର ହୋଇପଡିଛି । କିଏ ଘରକୁ ଫେରିପାରୁନି ତ କାହାର ଜୀବିକା ପ୍ରଭାବିତ ହେଉଛି । ସରକାରୀ ସାହାଯ୍ୟ ସମସ୍ତଙ୍କ ପାଇଁ ଉପଲବ୍ଧ । ହେଲେ ଏବେବି ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଛନ୍ତି କିଛି ଦିବ୍ୟାଙ୍ଗ ।
ଆମେ କହୁଛୁ ଢେଙ୍କାନାଳ ସଦର ବ୍ଲକ ଅନ୍ତର୍ଗତ ପାଇକ ଦହିକୋର ଗାଁର ଅସହାୟ ଦିବ୍ୟାଙ୍ଗଙ୍କ କଥା । ଏମାନେ ସମସ୍ତେ ବିଭିନ୍ନ ଜିଲ୍ଲାର ଭଜନ କଳାକାର । କିଏ କଟକ ତ କିଏ କେନ୍ଦୁଝର । କିଏ ପୁଣି ଭଦ୍ରକ ତ କିଏ ଅନୁଗୋଳ । ଗୋଟିଏ ଭଜନଗୋଷ୍ଠୀ ମାଧ୍ୟମରେ ହୋଇଛନ୍ତି ଏକାଠି । ବିଭିନ୍ନ ଗାଁ ଗାଁ ବୁଲି ଯାହା ରୋଜଗାର ହୁଏ ସେଥିରେ ସେମାନଙ୍କ ତେଲ ଲୁଣ ସଂସାର ଚଳିଯାଏ ।
ତେବେ ଲକଡାଉନ ଯୋଗୁଁ ଏମାନେ ଫସିଯାଇଛନ୍ତି । ଦୈନିକ ଗୁଜୁରାଣ ଠପ । ମୁଣ୍ଡ ଗୁଞ୍ଜିବାକୁ ପରିତ୍ୟକ୍ତ ଦୋକାନ ଘରଟିଏ ମାତ୍ର ମିଳିଯାଇଛି । ହେଲେ ସାମାଜିକ ଦୂରତ୍ବ କଥା କିଏ ପଚାରେ । ରାତି ପାହିଲେ ପେଟ ଚିନ୍ତା ଘାରୁଛି । ଏକାଠି ଅଛନ୍ତି କିନ୍ତୁ ମନେ ପଡୁଛି ଘର କଥା । ଦାନବାକ୍ସ ରଖି ଭଜନ ସନ୍ଧ୍ୟା କରି ଚଳିଯାଆନ୍ତି । ହେଲେ ଲକଡାଉନ ଯୋଗୁଁ ଭଜନ ସନ୍ଧ୍ୟା ବନ୍ଦ । ଦାନବାକ୍ସ ଖାଲି । ଘରକୁ ଫେରିବାରେ ପ୍ରତିବନ୍ଧକ ।
କୋରୋନା ଚଡକ ଏମାନଙ୍କୁ ସମ୍ପୂର୍ଣ୍ଣ ଭାବେ ଦୋହଲାଇଦେଇଛି । ସରକାର ଜୀବଜନ୍ତୁ ଠାରୁ ଅସହାୟ ମଣିଷ ସମସ୍ତଙ୍କୁ ସାହାଯ୍ୟ କରୁଛନ୍ତି । ହେଲେ ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଛନ୍ତି ଏହି ଦୃଷ୍ଟିହୀନ ଦିବ୍ୟାଙ୍ଗ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
