କଟକ: ଫନି ଆସିଲା ଆଉ ଚାଲିଗଲା । ହେଲେ କିଛି ଘଣ୍ଟାର କରାଳରୂପରେ ଛାରଖାର କରିଦେଇଗଲା ସାରା ସହରକୁ । ଏବେ ଚାରିଆଡେ ହା ହା କାର । ନାଁ ଅଛି ପାନୀୟ ଜଳ ନା ଖାଦ୍ୟ । ଯେଉଁ କାରଣରୁ ଛକ ଛକରେ ଜଳୁଛି ଆକ୍ରୋଶର ନିଆଁ । ସରକାରଙ୍କ ଘୋଷିତ ରିଲିଫ୍ ବ୍ୟବସ୍ଥା କେବଳ କାଗଜ କଲମରେ ସୀମିତ ହୋଇ ରହିଯାଇଛି । ଯାହାକୁ ନେଇ ତୀଵ୍ର ଅସନ୍ତୋଷ ପ୍ରକାଶ କରିଛନ୍ତି କଟକ ସହରର ତଳିଆ ଅଞ୍ଚଳ ବାସିନ୍ଦା ।
ଏଦୃଶ୍ୟ ହେଉଛି କଟକ କେନାଲ ରୋଡ଼ ବସ୍ତିର । ଫନି ଯିବାକୁ ଅନେକ ଦିନ ବିତିଯାଇଥିଲେ ସୁଦ୍ଧା ଏଯାବତ ଲୋକଙ୍କ ପାଖରେ ପହଞ୍ଚିନି ପ୍ରଶାସନର ସାହାଯ୍ୟ । ଫଳରେ ରାସ୍ତା ଘାଟରେ ନିଆଁ ଜାଳି ସରକାର ଓ ଜିଲ୍ଲା ପ୍ରଶାସନ ବିରୁଦ୍ଧରେ ନାରା ବାଜି କରୁଛନ୍ତି ତଳିଆ ଅଞ୍ଚଳ ବାସିନ୍ଦା । ସେପଟେ ବିଜୁଳି ଓ ପାନୀୟ ଜଳରୁ ବଞ୍ଚିତ ରହିଥିବା ସହରବାସୀ ନିଜ ଦୈନନ୍ଦିନ କାର୍ଯ୍ୟରେ ମହାନଦୀର ପାଣିକୁ ବ୍ୟବହାର କରୁଛନ୍ତି ।
ଅନ୍ୟପଟେ ଜିଲ୍ଲାର ମୁଖ୍ୟ ମେଡିକାଲ ଲାଇନରେ ବିଜୁଳି ସଂଯୋଗ ଦିଆଯାଇଥିବାବେଳେ କିଛି ଦିନ ମଧ୍ୟରେ ପାନୀୟ ଜଳର ବ୍ୟବସ୍ଥା ମଧ୍ୟ ସୁଚାର ରୂପେ ହେବ ବୋଲି ଜିଲ୍ଲାପାଳ ସୂଚନା ଦେଇଛନ୍ତି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
