କଟକ/ ଭୁବନେଶ୍ବର: କେନ୍ଦ୍ରାଞ୍ଚଳ ଅବକାରୀ ଗୋଇନ୍ଦା ବିଭାଗ ହାତରେ ଲାଗିଲା 53 ଗ୍ରାମର ବ୍ରାଉନସୁଗାର। ଯାହାର ମୂଲ୍ୟ ଆନୁମାନିକ 5 ଲକ୍ଷ ଟଙ୍କାରୁ ଉର୍ଦ୍ଧ୍ବ ବୋଲି ଜଣାପଡିଛି । ସୂଚନାମୁତାବକ ଭୁବନେଶ୍ବରର ମଞ୍ଚେଶ୍ୱର ଅଞ୍ଚଳରେ ଜଣେ ଦୁର୍ବୁତ୍ତ ବ୍ରାଉନସୁଗାର କାରବାର କରିବା ସମୟରେ ବିଭାଗୀୟ କର୍ମଚାରୀଙ୍କ ହାତରେ ଧରା ପଡିଛି। ଗିରଫ ବ୍ୟକ୍ତି ଜଣକ ହେଲେ ଖୋର୍ଦ୍ଧା ଜିଲ୍ଲାର କୃଷ୍ଣଚନ୍ଦ୍ର ନାଥ ।
ସେହିପରି ରାଜଧାନୀର ନୟାପଲ୍ଲୀ ଥାନା ପୋଲିସ ଓ କିୟ୍ୟୁଏଟିର ମିଳିତ ଉଦ୍ୟମରେ ସଲିଆ ସାହିର ମୁଣ୍ଡାସାହି ନିକଟରେ ବୁଲୁ ନାମକ ଜଣେ ଯୁବକକୁ ଗିରଫ କରାଯାଇଛି । ତେବେ ବ୍ରାଉନସୁଗାର କାରବାର କରୁଥିବା ସମୟରେ ସେ ଧରା ପଡିଛି। ଗିରଫ ବ୍ୟକ୍ତି ଠାରୁ ୨୦ ଗ୍ରାମର ବ୍ରାଉନସୁଗାର ସହ ୫ହଜାର ଟଙ୍କା, ଗୋଟିଏ ବାଇକ୍ ଓ ଏକ ମୋବାଇଲ ଫୋନ ପୋଲିସ ଜବତ କରିଛି। ସେ ଜଳେଶ୍ଵରରୁ ବ୍ରାଉନ ସୁଗାର ଆଣି ରାଜଧାନୀରେ ବିକୁଥିବା ପୋଲିସକୁ କହିଛି।
ବ୍ରାଉନସୁଗାର ବ୍ୟବସାୟୀ ବୁଲୁ ନାୟକକୁ ଗିରଫ କରି କୋର୍ଟ ଚାଲାଣ କରାଯାଇଛି। ହଳଦୀ ପଡିଆ ବସ୍ତି ପରେ ଏବେ ସଲିଆସହି ପାଲଟିଛି ଧଳା ଜହରର କାରବାରର ପେଣ୍ଠସ୍ଥଳ । ସେଠାରେ ବ୍ରାଉନସୁଗାର ଅଧିକ ପରିମାଣରେ ବିକ୍ରି ହେଉଥିବାର ନଜରକୁ ଆସୁଛି । ଶୁକ୍ରବାର ଦିନ ପୋଲିସ୍କୁ ସଲିଆ ସାହି ବ୍ରାଉନସୁଗାର କାରବାର ହେଇଥିବା ସୂଚନା ମିଳିଥିଲା।
ଏହାପରେ ନୟାପଲ୍ଲୀ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଚଢଉ କରିଥିଲା । ତେବେ ଗିରଫ ହୋଇଥିବା ବୁଲୁ ନାମରେ ନୟାପଲ୍ଲୀ ଥାନାରେ ଏକାଧିକ ମାମଲା ରହିଛି । ଏନେଇ ପୋଲିସ ତଦନ୍ତ ଜାରି ରହିଛି ।
କଟକରୁ ପ୍ରଭୁକଲ୍ଯାଣ ପାଲ୍ ଏବଂ ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
