ବ୍ରହ୍ମପୁର: ଭାରସାମ୍ୟ ହରାଇ ଗଛକୁ ପିଟି ହେଲା ବାଇକ । ଦୁର୍ଘଟଣାରେ ବାଇକ ଚାଳକ ମୃତ ଓ ଅନ୍ୟ ଜଣେ ଗୁରୁତର ଆହତ ହୋଇଥିବା ଜଣାପଡିଛି । ଏହି ଅଭାବନୀୟ ଘଟଣା ଘଟିଛି ଗଞ୍ଜାମ ଦିଗପହଣ୍ଡି ବ୍ଲକ କଇଠଖଣ୍ଡି ପଞ୍ଚାୟତ ଅନ୍ତର୍ଗତ ବୋରିପଦର ମୁଖ୍ୟ ରାସ୍ତାରେ ।
ମୃତକ ହେଉଛନ୍ତି ପାଟପୁର ଥାନା ଅନ୍ତର୍ଗତ କଲରାପଦର ଗ୍ରାମର ସ୍ବର୍ଗତ ତ୍ରିନାଥ ମହାରଣାଙ୍କ ପୁତ୍ର ନରସିଂହ ମହାରଣା ଏବଂ ଗୁରୁତର ହୋଇଥିବା ବୃଦ୍ଧ ଜଣକ ହେଲେ ହିଞ୍ଜିଳି ଥାନା ଅନ୍ତର୍ଗତ ଲେଙ୍କାଖାଳି ଗ୍ରାମର ୭୦ ବର୍ଷୀୟ ବାୟା ଦାସ ।
ସୂଚନାନୁଯାୟୀ ମୃତ ନରସିଂହ ନିଜ ମୋଟର ସାଇକେଲରେ ଦିଗପହଣ୍ଡି ଥାନା ଗୁଲୁଣ୍ଡା ଗ୍ରାମକୁ କୈାଣସି ଏକ ମନ୍ଦିର କାମରେ ଯିବା ପାଇଁ ବାହାରିଥିଲେ । ହେଲେ ପୂର୍ବରୁ ଦିଗପହଣ୍ଡି ପୁଞ୍ଜିକୟା ଛକଠାରୁ ଥିବା ବୃଦ୍ଧ ବାୟାଙ୍କୁ ଧରି ଯିବା ସମୟରେ ବୋରିପଦର ଗ୍ରାମ ନିକଟରେ ଭାରସାମ୍ୟ ହରାଇ ଏକ ଗଛ ସହ ଧକ୍କା ହୋଇଥିଲା । ଗୁରୁତର ଅବସ୍ଥାରେ ଉଭୟଙ୍କୁ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ହେଲେ ସ୍ବାସ୍ଥ୍ୟ କେନ୍ଦ୍ରରେ ଡାକ୍ତର ନରସିଂହଙ୍କୁ ମୃତ ଘୋଷଣା କରିଥିଲେ । ଘଟଣାସ୍ଥଳରେ ଦିଗପହଣ୍ଡି ପୋଲିସ ପହଞ୍ଚି ତଦନ୍ତ କରିବା ସହ ନରସିଂହଙ୍କ ମୃତଦେହକୁ ଜବତ କରି ଶବ ବ୍ୟବଚ୍ଛେଦ ନିମନ୍ତେ ପଠାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
