ଡେରାଡୁନ୍: ଚାରି ଧାମ ମଧ୍ୟରେ ଅନ୍ୟତମ ବଦ୍ରୀନାଥଧାମର କବାଟ ଶୁକ୍ରବାର ବ୍ରହ୍ମମୁହୂର୍ତ୍ତ ସମୟ ଭୋର 4ଟା15ରେ ଖୋଲାଯାଇଛି । ସମ୍ପୂର୍ଣ୍ଣ ମନ୍ଦିରକୁ ସୁଗନ୍ଧିତ ଫୁଲରେ ସଜାଯାଇଛି । ତେବେ ବଦ୍ରୀନାଥର କବାଟ ଖୋଲାଯିବା ପରେ 6ମାସ ହେଲା ଜଳୁଥିବା ଅଖଣ୍ଡଜ୍ୟୋତିର ଦର୍ଶନ ପ୍ରାୟ 10ହଜାର ଭକ୍ତ କରିଛନ୍ତି । ଏହାସହ ସେଠାରେ 12ହଜାରରୁ ଅଧିକ ଭକ୍ତ ଭଗବାନ ବଦ୍ରୀନାଥଙ୍କ ଦର୍ଶନ ନିମନ୍ତେ ଲାଇନ୍ରେ ଛିଡା ହୋଇଥିଲେ ।
ଏହି ଶୁଭ ମୂହୁର୍ତ୍ତରେ ଉତ୍ତରାଖଣ୍ଡର ରାଜ୍ୟପାଳ ବେବୀ ରାଣୀ ମୌର୍ଯ୍ୟ, ପୂର୍ବ ମୁଖ୍ୟମନ୍ତ୍ରୀ ରମେଶ ପୋଖରିୟାଲ ନିଶାଙ୍କ ଓ ବଦ୍ରାନାଥର ବିଧାୟକ ମହେନ୍ଦ୍ର ଭଟ୍ଟ ପ୍ରମୁଖ ଉପସ୍ଥିତ ଥିଲେ ।
ତେବେ ପ୍ରଥମ ଦିନରେ ଶ୍ରଦ୍ଧାଳୁଙ୍କୁ ଘୃତ କମ୍ବଳ ପ୍ରସାଦ ରୂପରେ ଦିଆଯାଇଛି । ଶୀତସମୟରେ ଭଗବାନ ବଦ୍ରୀନାଥଙ୍କ ମୂର୍ତ୍ତିକୁ ଶୀତରୁ ରକ୍ଷା କରିବା ପାଇଁ ଏହି ଘୃତ କମ୍ବଳର ବ୍ୟବହାର କରାଯାଇଥାଏ । ପରମ୍ପରା ଅନୁସାରେ ସେଠାକାର ଏକ ସ୍ଥାନୀୟ ଗ୍ରାମ ମାଣାର କନ୍ୟା ସେହି କମ୍ବଳ ତିଆରି କରିଥାନ୍ତି । ସେହି କମ୍ବଳରେ ଘିଅର ପ୍ରଲେପ ଦେଇ ଭଗବାନ ବଦ୍ରୀନାଥଙ୍କୁ ଘୋଡେଇ ଦିଆଯାଇଥାଏ ।
ସୂଚନାଥାଉକି,ପ୍ରତିବର୍ଷ ଶୀତଦିନରେ ଅର୍ଥାତ୍ ଅକ୍ଟୋବର-ନଭେମ୍ବର ମାସ ମଧ୍ୟରେ ବଦ୍ରୀନାଥଙ୍କ କବାଟ ବନ୍ଦ କରି ଦିଆଯାଇଥାଏ । ଶୀତମାସ ର ସମାପ୍ତି ପରେ ବସନ୍ତ ପଞ୍ଚମୀ ଦିନ ରାଜପୁରୋହିତଙ୍କ ଦ୍ବାରା କବାଟ ଖୋଲିବାର ସମୟ ନିର୍ଦ୍ଧାରିତ କରାଯାଇଥାଏ । ସେହି ତିଥିରେ ବଦ୍ରୀନାଥଧାମର କବାଟ ଖୋଲାଯାଏ ।
