ବାଲେଶ୍ବର: ରାଜ୍ୟରେ ବଢୁଛି ଅପରାଧ ସଂଖ୍ୟା। ଏହି ପର୍ଯ୍ୟାୟରେ ବାଲେଶ୍ବର ଜିଲ୍ଲାରେ ମାତିଛନ୍ତି ଏଟିଏମ ଲୁଟେରା । ଗତ କିଛି ଦିନ ତଳେ 4 ଜଣ ଏଟିଏମ ଲୁଟେରାଙ୍କୁ ଗିରଫ ହୋଇଥିବା ବେଳେ ମଙ୍ଗଳବାର ବାଲେଶ୍ବରରେ ପୁଣି ଏକ ଏଟିଏମ ଲୁଟ ଘଟଣା ସାମନାକୁ ଆସିଛି । ଜିଲ୍ଲାରେ ଘଟଣାର ପୁନରାବୃତ୍ତି କରି ପୋଲିସକୁ ସିଧାସଳଖ ଚାଲେଞ୍ଜ ଦେଇଛନ୍ତି ଦୁର୍ବୃତ୍ତ ।
ସୂଚନାନୁସାରେ, ସୋର କଲେଜ ଛକରେ ଥିବା ଫେଡେରାଲ ବ୍ୟାଙ୍କ ଏଟିଏମକୁ ସୋମବାର ବିଳମ୍ବିତ ରାତିରେ ଦୁର୍ବୃତ୍ତମାନେ ଲୁଟ କରିଛନ୍ତି। ଦୁର୍ବୃତ୍ତମାନେ ଏଟିଏମ ତାଡି ନେଇଥିବା ବେଳେ ସେଠାରେ ଲାଗିଥିବା ସିସିଟିଭି ମଧ୍ୟ ତାଡି ଫିଙ୍ଗି ଦେଇଛନ୍ତି । ତେବେ ଏଟିଏମରୁ କେତେ ଟଙ୍କା ଲୁଟ ହୋଇଛି ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ ।
ଗତ କିଛି ଦିନ ତଳେ ଜିଲ୍ଲାରେ ଏଟିଏମ ଲୁଟ ଘଟଣାରେ ପୋଲିସ ମୁଖ୍ୟ ଆସାମୀ ସହ ତାର 4 ସହଯୋଗୀଙ୍କୁ ଗିରଫ କରିଥିବା ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଥିଲେ। ଜିଲ୍ଲାର ସୁରକ୍ଷା ପାଇଁ ପୋଲିସ ରାତିରେ ପାଟ୍ରୋଲିଂ କରୁଛନ୍ତି । ଏହି ପାଟ୍ରୋଲିଂରେ ପୋଲିସ ଢିଲା କରୁଥିବାରୁ ଜିଲ୍ଲାରେ ଏମିତି ଘଟଣା ଘଟୁଛି ବୋଲି ସାଧାରଣରେ ମତ ପ୍ରକାଶ ପାଉଛି । ସେପଟେ ସୋର ପୋଲିସ ଘଟଣାର ଅଭଯୁକ୍ତକୁ ଧରିବା ପାଇଁ ତଦନ୍ତ ଜାରି ରଖିଥିବା ଜଣାପଡିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
