କଟକ: ସିଲଭରସିଟିରେ ଲୁଟେରାଙ୍କ ଆତଙ୍କ । ରାତି ହେଲେ ସହରର ପ୍ରମୁଖ ସ୍ଥାନରେ ବଢୁଛି ଅପରାଧୀଙ୍କ ପ୍ରାର୍ଦୁଭାବ। ବିଶେଷକରି ଲୋକାରଣ୍ୟ ସ୍ଥାନ ଗୁଡିକରେ ଏମାନଙ୍କ ପତିଆରା ଦେଖିବାକୁ ମିଳୁଛି । ଗୁରୁବାର ମଙ୍ଗଳାବାଗ ଏସବିଆଇ ଶାଖା ବ୍ୟାଙ୍କରୁ ଲୁଟ ଉଦ୍ୟମ ହୋଇଥିଲା । ଯାହା ଥାନାରୁ ମାତ୍ର ଶହେ ମିଟର ଦୂରରେ ଥିଲା । ସହର ମଧ୍ୟରେ ବାରମ୍ବାର ଏଭଳି ଘଟଣା ଘଟୁଥିବାବେଳେ କମିଶନରେଟ୍ ପୋଲିସର ସକ୍ରିୟତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।
ସୂଚନାନୁସାରେ, ଗୁରୁବାର ବିଳମ୍ବିତ ରାତିରେ କିଛି ଦୁର୍ବୁତ୍ତ ମଙ୍ଗଳାବାଗ ସ୍ଥିତ ଏସବିଆଇ ବ୍ୟାଙ୍କ ମଧ୍ୟକୁ ପ୍ରବେଶ କରି ଲୁଟ ଉଦ୍ୟମ କରିଥିଲେ । ତେବେ ସତର୍କ ଘଣ୍ଟି ବାଜିବାରୁ ସେଠାରୁ ଫେରାର ହୋଇଯାଇଥିଲେ ଲୁଟେରା ଦଳ। ଏଭଳି ପଦକ୍ଷେପ ନେଇ ପୋଲିସକୁ ସିଧାସଳଖ ଚ୍ୟାଲେଞ୍ଜ କରିଛି ଏହି ଗ୍ୟାଙ୍ଗ ।
ପୂର୍ବରୁ ମଧୁପାଟଣା ଅଞ୍ଚଳରେ ମଧ୍ୟ ସମାନ ଦୃଶ୍ୟ ଦେଖିବାକୁ ମିଳିଥିଲା । ମଧୁପାଟଣା ଥାନା ସାମ୍ନା ଏକ ଗାଡି ପାର୍ଟସ ଦୋକାନରୁ ଲକ୍ଷାଧିକ ଟଙ୍କା ଲୁଟ କରିଥିଲେ ଲୁଟେରା । ଯାହାର ଟେର୍ ବର୍ତ୍ତମାନ ସୁଦ୍ଧା ପୋଲିସକୁ ମିଳିନାହିଁ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
