ନୂଆଦିଲ୍ଲୀ: ଦେଶକୁ ଆସୁଛି ଆଉ ଏକ କୋରୋନା ଟିକା । ସ୍ବଦେଶୀ ଫାର୍ମା କମ୍ପାନୀ ଜାଏଡ଼ସ କ୍ୟାଡିଲା(Zydus Cadila)ର କୋଭିଡ ଟିକାକୁ ଏହି ସପ୍ତାହରେ ମିଳିପାରେ ଅନୁମୋଦନ । ଡ୍ରଗ୍ସ କଣ୍ଟ୍ରୋଲର ଜେନେରାଲ ଅଫ ଇଣ୍ଡିଆ(DCGI) ଏହି ଟିକାକୁ ଅନୁମୋଦନ ଦେଇପାରେ ବୋଲି ସୂଚନା ମିଳିଛି ।
ଗୁଜୁରାଟର ଅହମ୍ମଦାବାଦରେ ଥିବା ଏହି ଫାର୍ମା କମ୍ପାନୀ କୋଭିଡ଼ ମହାମାରୀ ବିରୋଧରେ ଦେଶରେ ପ୍ରଥମ DNA ଭ୍ୟାକ୍ସିନ ପ୍ରସ୍ତୁତ କରିଛି । ଏହି ଟିକାର ନାମ ଜାଏକୋଭ-ଡି (ZyCov-D) ରଖାଯାଇଛି । ଜୁଲାଇ ମାସ ଆରମ୍ଭରୁ ଏହି ଟିକାର ଜରୁରୀକାଳୀନ ବ୍ୟବହାର ପାଇଁ DCGIକୁ କମ୍ପାନୀ ଆବେଦନ କରିଥିଲା ।
କମ୍ପାନୀ ଏପର୍ଯ୍ୟନ୍ତ ଭାରତରେ ୫୦ରୁ ଅଧିକ କେନ୍ଦ୍ରରେ ଏହି ଟିକାର କ୍ଲିନିକାଲ ଟ୍ରାଏଲ କରିଛି । ତେବେ କମ୍ପାନୀର ଏହି DNA ଟିକା ଜେନେଟିକ୍ ଇଞ୍ଜିନିୟରିଂ ମାଧ୍ୟମରେ ଶରୀର ମଧ୍ୟକୁ ପ୍ରବେଶ କରାଯାଏ । ଏହା ଶରୀରରେ ପ୍ରୋଟିନ ତିଆରି କରିଥାଏ । ଏହି ପ୍ରୋଟିନ କୋରୋନା ଭୂତାଣୁଠାରୁ ଶରୀରକୁ ସୁରକ୍ଷା ଦେବା ପାଇଁ ଆଣ୍ଟିବଡି ଉତ୍ପାଦନ କରିଥାଏ ।
ବ୍ୟୁରୋ ରିପୋର୍ଟ, ଇଟିଭି ଭାରତ
