ପାଟନା: ୪ ଦିନ ତଳେ ନିଖୋଜ ଥିବା ବିହାରର ଜଣେ ଯୁବ ସାମ୍ବାଦିକଙ୍କ ମୃତଦେହ ଉଦ୍ଧାର । ବିହାରର ମଧୁବାନି ଜିଲ୍ଲା ନିକଟସ୍ଥ ରାସ୍ତାକଡରୁ ଯୁବକଙ୍କ ପୋଡା ଶରୀର ଉଦ୍ଧାର ହୋଇଛି । କେହି ଦୁର୍ବୃତ୍ତ ତାଙ୍କୁ ଜିଅନ୍ତା ଜାଳି ଦେଇଥିବା କୁହାଯାଉଛି । ତେବେ ମୃତ ଯୁବକ ଜଣକ ହେଉଛନ୍ତି ୨୨ ବର୍ଷିୟ ବୁଦ୍ଧନାଥ ଝା ଛଦ୍ମନାମ ଅବିନାଶ ।
ବୁଦ୍ଧନାଥ ସ୍ଥାନୀୟ ଏକ ୱେବ ପୋର୍ଟାଲରେ କାର୍ଯ୍ୟ କରୁଥିଲେ । ସେ ଏକ ଫେସବୁକ୍ ପୋଷ୍ଟ ଅପଲୋଡ୍ କରିବାର ଦୁଇ ଦିନ ପରେ ନିଖୋଜ ହୋଇଯାଇଥିଲେ, ଯେଉଁଥିରେ ନକଲି ମେଡିକାଲ୍ କ୍ଲିନିକ୍ ଖୋଲାଯାଇଥିବା ଘଟଣାର ପର୍ଦ୍ଦାଫାସ କରିଥିଲେ । ତାଙ୍କର ଏହି କାର୍ଯ୍ୟ ଦ୍ବାରା କିଛି କ୍ଲିନିକ୍ ବନ୍ଦ ହୋଇଯାଇଥିଲା ଏବଂ ସେମାନଙ୍କ ଉପରେ ଜରିମାନା ମଧ୍ୟ ପକାଯାଇଥିଲା ।
ବୁଦ୍ଧନାଥଙ୍କୁ ଏହି ଖବର ପ୍ରସାରଣ ନ କରିବା ପାଇଁ ଲାଞ୍ଚ ଦିଆଯାଇଥିଲା । ପରବର୍ତ୍ତୀ ସମୟରେ ହତ୍ୟା ଧମକ ମଧ୍ୟ ଦିଆଯାଇଥିଲା । ମାତ୍ର ସେ ତାଙ୍କ କାମରେ ନିବୃତ୍ତ ରହିନଥିଲେ । କିନ୍ତୁ ଶେଷରେ ନିରପେକ୍ଷ ଖବର ପ୍ରସାରଣ କରି ବୁଦ୍ଧନାଥଙ୍କୁ ଦୁର୍ବୃତ୍ତଙ୍କ ଶିକାର ହେବାକୁ ପଡିଛି ।
ତେବେ ଶେଷଥର ପାଇଁ ବୁଦ୍ଧନାଥଙ୍କୁ ମଙ୍ଗଳବାର ରାତି ପ୍ରାୟ 10ଟା ସମୟରେ ତାଙ୍କ ଘର ନିକଟରରେ ଦେଖିବାକୁ ମିଳିଥିଲା । ସେ ତାଙ୍କ ଘରେ ଆଗରେ ଯାଉଥିବା, ସିସିଟିଭି ଫୁଟେଜରୁ ଦେଖିବାକୁ ମିଳିଥିଲା । ଏହାପରେ ବୁଦ୍ଧନାଥଙ୍କ ବଡ ଭାଇ ଥାନାରେ ଅଭିଯୋଗ କରିଥିଲେ । ସ୍ଥାନୀୟ କେତେକ ନକଲି ନର୍ସିଂହୋମ ମାଲିକ ତାଙ୍କୁ ଲୋକ ଲଗାଇ ଅପହରଣ କରିଥିବା ସେ ଅଭିଯୋଗରେ ଉଲ୍ଲେଖ କରିଥିଲେ ।
ବହୁ ଖୋଜାଖୋଜି ସତ୍ତ୍ବେ ବୁଦ୍ଧନାଥଙ୍କ ପତ୍ତା ମିଳିନଥିଲା । ଶୁକ୍ରବାର ବୁଦ୍ଧନାଥଙ୍କ ମୃତଦେହ ଉଦ୍ଧାର ହୋଇଛି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
